KOVALIMA, 09 Marsu 2026 (TATOLI)- Assosisaun Kooperativa Feto (AKF) Suku Matai, postu administrativu Maucatar, munisípiu Kovalima, segunda- ne’e, aprezenta programa feira, hodi komemora loron Internasionál feto rurál ne’ebé realiza iha loron 15 fulan-Outubru iha Munisípiu Kovalima.
“Ami mai atu aprezenta ami-nia programa ne’ebé mak durante ne’e ami hala’o iha ámbitu preparasaun ba komemora loron Internasionál feto rurál iha suku Matai,” Prezidente Assosiasaun Kooperativa suku Matai, Fátima Amaral Freitas hateten ba jornalista sira hafoin halo enkontru ho xefe Suku Matai, iha Sede Suku Matai, ohin.
Tuir planu atividade feira ne’e sei foku ba feira artezenatu no mós produtu lokál husi suku Matai ne’ebé sei hala’o durante semana ida iha suku refere.
Assosisaun Kooperativa Feto (AJF) Suku Matai ho ninia membru hamutuk 192 ne’ebé sai mahan husi grupu lima mak hanesan grupu Solidariedade ho nia membru 80, Grupu haforsa ho nia membru 24, grupu Naroman membru ho ninia membru 33, grupu esperansa ho membru 26 no grupu unidade ho membru 30 depois assosiasaun ne’e eziste iha 2023.
Nia dehan, objetivu husi estabelesimentu grupu kooperativa ne’e maka atu enkoraja no envolve feto sira iha organizasaun ho baze kooperativa no mós apoiu feto ba halo mudansa iha suku Matai.
Assosisaun Grupu Kooperativa daudaun hetan ona lukru rihun $10 tanba hetan kontribuisaun husi membru grupu kada fulan tenke kontribui osan $11.00. AJF durante ne’e hetan apoiu formasaun husi World-Vision Timor-Leste kona-bá oinsá atu jere kooperativa ne’e iha futuru.
Iha sorin seluk Xefe Suku Matai, Nuno José Mesquito Perreira dehan sorumutu ho assosiasaun ne’e atu rona progesu saida maka sira atinje ona durante sira-ninia ejistensia.
“Asosisaun aprezenta sira-nia progresu servisu mak hanesan forma estrutura durante ne’e hodi apresenta sira-nia dezeñu hodi halo logo, aprezenta totál membru, fatin servisu ba Asosisaun “ nia hatutan.
Nune’e mós halo diskusaun kona-bá, programa feira hodi komemora loron Internasionál feto rurál ne’ebé sei hala’o iha loron 15 fulan-Outobru 2026.
Jornalista :Celestina Teles
Editór : Florencio Miranda Ximenes
