BAUCAU, 26 abríl 2023 (TATOLI) – Vise Chanceler Dioseze Baucau, Padre Dionísio F.D.G.Soares, agradese ba desizaun Vatikanu kona-ba nomeasaun ba Padre Leandro Alves Maria, lidera sarani Dioseze Baucau.
Karta ne’ebé hato’o hosi reprezentate Santa Sé iha Timor-Leste, Monsionur Marco, Sprizzi, ba Saserdotál, relijioza no reliziozu liuhosi Administradór Diosezanu Dioseze Baucau, Padre Alípio Pinto Gusmão, katak Amu Papa hili ona Padre Leandro Alves Maria nu’udar Bispu foun Dioseze Baucau.
“Nune’e kona-ba deisizaun atu toma pose deside direita hosi Bispu foun Dioseze Baucau nian,” Vise chanceler Diocese Baucau hateten iha Salaun São José, Vila Antiga, kuarta ne’e.
Padre Leandro Alves hosi kongresaun Diosezanu hosi munisípiu Ermera atuál nu’udar paróku Parókia Katedrál Dioseze Dili no sekretáriu ezekutivu episkopál timorense (CET, sigla Portugés).
Nune’e prosesu tomak kona-ba atu hasoru ordenasaun no toma pose nu’udar Bispu sei prepara hahú hosi loron-kinta, 27 abríl to’o fulan-tolu mai tanba presiza koordenasaun ho bispu eleitu.
Dioseze Baucau agradese ba Maromak ba prosesu hotu ne’ebé halo hamutuk hodi too ohin loron iha ona nomeasaun ba bispu foun Dioseze Baucau ne’ebé sai susesór ba saudozu Dom Basílio do Nascimento.
“Ita agradese ba Maromak ohin ita hetan ona Dom Basilio nia susesór,” Padre Dionísio Soares akresenta.
Dioseze Baucau rasik durante tinan-ida resin laiha bispu hafoin Bispu matebian Dom Basílio do Nascimento hakotu iis iha Ospitál Nasionál Guido Valadares (HNGV, sigla portugés) loron-30 fulan-outubru 2021 bainhira hetan atakasaun fuan iha munisípiu Covalima.
Notísia relevante: Biografia Bispu Basílio no bele ko’alia lian estranjeira neen
Jornalista : Natalino Belo
Editór : Evaristo Soares Martins
