DILI, 20 Jullu 2025 (TATOLI) – Ekipa nasionál Saúde husi Ministériu Saúde halo atendimentu ba adeptu sira hamutuk na’in-12 durante abertura jogu Komunidade Ko’alia Lian Portugés (CPLP, sigla portugés) ne’ebé realiza iha Kapitál Timor-Leste, Dili.
“Horisehik ita-nia jogu desportivu CPLP antes hahú 15:00 tama ba estádiu avó ida ho idade 62 anos maka desmaia tanba loron manas entaun entaun ita ekipa evakua lori kedas ba sentru saúde Formoza, depois iha kalan ne’e adeptu na’in-11 mak desmaia, entaun ita-nia ekipa saúde atende kedas no ema na’in hirak-ne’e rekupera hikas,” Koordenador Komisaun ba Pesoál Saúde ne’ebé atende ba jogu CPLP, Simplicio Amaral, ko’alia iha Kampu Tenis, UNTL Sentral, ohin.
Nia dehan, atleta desportivu tenis kampu bainhira monu ekipa saude nasionál la intervein tanba sira-nia médiku desportivu iha atu atende lalais.
“Husi ita-nia atleta sira, ita-nia ekipa saúde nasionál la intervein, tanba sira iha médiku desportivu, sira-ne’ebé maka soke malu uitoan monu tún pesoál saúde tama asegura lalais, depois sira hamriik fila fali, depois sira joga, ne’ebé ekipa saúde nasionál halo atendimentu direita ba iha atleta sira timor maibé sira hamriik joga fila fali,” nia informa.
Médiku sira husi estrajeiru ne’ebé apoia médiku Timor-Leste maka husi Portugál hamutuk sia, husi ne’e médiku na’in-tolu no enfermeiru na’in-neen no médiku husi nasaun seluk seidauk iha dadus.
Jornalista : Felicidade Ximenes
Editór: Evaristo Soares Martins
