DILI, 07 marsu 2023 (TATOLI)–Diretór Servisu Edukasaun Munisípiu Aileu, Carlito Pereira, hateten iha marsu to’o dezembru ne’e sei implementa merenda eskolár ba estudante 12.075 iha Aileu tanba Servisu Edukasaun prevee ona orsamentu ba programa ne’e ho montante $839.234.
Nia hateten, antes ne’e sira iha de’it totál estudante hamutuk 10.887 no númeru ida-ne’e kabe de’it ba estudante nivél ensinu báziku nian maibé depois aumenta tan ho nivél edukasaun Pre-Eskolár 1.188 ne’e mak númeru estudante ne’ebé atu hetan merenda eskolár ne’e sa’e ba 12.075.
“Hosi totál númeru estudante ne’ebé identifikadu ona hosi nivel eskolaridade rua ne’e mak dirasaun konsege prevee ona totál orsamentu ho montante $839.234, hodi apoiu programa merenda eskolár ne’e ba tinan ida sura hosi fulan marsu to’o dezembru 2023, ho loron efetivu 152 no kada loron estudante ida han 42 sentavu,” Carlito Pereira hateten ba Agência Tatoli iha edifísiu MEJD, Vila Verde, tersa ne’e
Tuir nia, totál orsamentu $839.234 ne’e prevee ona ba tinan ida-ne’e no hodi fahe ba edukasaun Pre-Eskolár $71.991 no ensinu báziku $767.129, hein katak fulan ida-ne’e mak prosesu loke konta bankária ba grupu 14 ne’e loos ona, nune’e bele transfere ona osan sira-nia konta hodi hahú ona merenda eskolá.
Programa merenda eskolár ba tinan ida-ne’e halakon tiha fulan rua janeiru no fevereiru tanba ne’e sei sura de’it hosi fulan marsu ba oin. Depois programa ida ne’e rasik agora ninia orsamentu prepara hosi Ministériu Administrasaun Estatál depois mak sei transfere mai munisípiu sira.
Entretantu, Ministériu Edukasaun Juventude no Desportu hamutuk ho parseiru sira-ne’ebé durante ne’e trata asuntu kona-ba merenda eskolár sei kontrola no observa kona ba menu sira-ne’ebé mak deside ona atu grupu sira-ne’ebé mak hetan fiar hodi prepara aihan ba estudante sira ne’e labele viola ka muda fali menu ne’ebé termina ona.
Jornalista : Tomé Amado
Editór : Cancio Ximenes
