DÍLI, 30 Juñu 2026 (TATOLI) – Koordenadór Eskola Ensinu Báziku Fillial Hudi-Laran, Fernando da C. Guterres, husu ba Governu, liuhusi Ministériu Edukasaun (ME), atu konstrui muru proteksaun iha eskola refere, ho objetivu atu reforsa seguransa ba estudante sira.
Fernando explika katak eskola ne’e lokaliza iha área komunidade nia klaran no besik estrada públiku, ne’ebé halo estudante sira enfrenta risku boot durante movimentasaun loron-loron, liuliu iha tempu rekreu.
“Husu ba Governu, liuhusi Ministériu Edukasaun, atu konstrui muru proteksaun atu bele proteje estudante sira, tanba sala aula sira besik diretamente ho estrada, nune’e movimentasaun sai difisil no la seguru ba sira,” nia hateten ba TATOLI iha Hudi-Laran.
Nia mós haktuir katak falta espasu rekreu nian halo estudante sira obriga-an halimar iha estrada, situasaun ne’ebé aumenta risku akidente ho viatura sira.
“Fatin rekreu laiha ona, nune’e estudante sira sempre halimar iha estrada klaran. Ida-ne’e halo motor sira dala barak soke estudante sira,” nia dehan.
Tuir Fernando, eskola sujere ona ba ME atu konstrui muru proteksaun no konsidera mós planu alternativa hanesan muda estrada, maibé to’o agora seidauk simu resposta.
Nia subliña katak se muru protesaun la posivel, entaun governu presiza avalia opsaun seluk hanesan muda eskola ba fatin seluk, atu garante seguransa estudante sira nian durante prosesu aprendizajen.
Tuir dadus, Eskola Bázika 1-2 Hudi-Laran iha sala aula 8, inklui instalasaun hanesan haris fatin, eskritóriu ida, biblioteka ida, no dapur ba programa merenda eskola. Eskola ne’e iha profesór 30 no estudante 500-resin.
Jornalista: Camilio de Sousa
Editór: Filomeno Martins
