DILI, 22 Maiu 2026 (TATOLI) – Fundasaun Hadomi Timor (FHT) kapasita ona foin-sa’e 3,000 desde establisimentu organizasaun ne’e iha tinan 2013. Programa formasaun FHT foku liu ba Teknolojia Informasaun (IT) no lian estranjeira.
Programa formasaun IT konsentra liu ba kria website, seguransa sibernétika, intelijénsia artifisiál (AI), no literasia komputadór, inklui programa formasaun IT SMART.
FHT mós fahe koñesimentu kona-ba seguransa online no lei kontra krime sibernétiku, inklui protesaun ba feto no grupu vulnerável iha espasu dijitál.
Partisipante sira mós envolve iha diskusaun inkluzivu, advokasia, organizasaun painél no workshop kona-ba transformasaun dijitál, analiza dadus, no dezenvolve infraestrutura internet ne’ebé inkluzivu.
Diretór Ezekutivu FHT, Abrão Monteiro ‘Nicho Linux’, hateten katak programa formasaun sira ne’e fó ona kontribuisaun signifikante ba foin-sa’e sira bainhira konkore ba oportunidade serbisu iha rai-laran no rai-liur.
“Desde ita estabelese FHT iha 2013, ita kapasita ona kuaze 3,000 foin-sa’e iha área IT, no formasaun lian Inglés, Korea no Japaun. Kuaze foin-sa’e 200 resin mak hetan ona empregu iha instituisaun governu, ONG internasionál no instituisaun seluk iha Timor-Leste,” Linux ba TATOLI iha Palapasu, Dili.
Nia dehan benefisiáriu barak husi programa lian tolu ne’e mak ba servisu ona iha Repúblika Korea, Inglaterra, Australia no Nova Zelándia.
Implementasaun programa sira ne’e hetan apoiu finanseiru husi Gabinete de Apoiu ba Sosiedade Sivil (GASC), The Asia Foundation (TAF), no ASEAN Net iha Tailándia.
Journalista: Camilio de Sousa
Editór: Filomeno Martins
