OÉ-CUSSE, 28 Janeiru 2025 (TATOLI) – Husi loron 01 to’o 27 Janeiru 2025, Autoridade Protesaun Sivíl Rejiaun Administrativa Espesiál Oé-Cusse Ambeno (RAEOA), rejista dezastre naturál hanesan kazu inséndiu, ai-hanehan uma tanba anin-boot, rai halai no inundasaun hamutuk 30.
Tuir dadus APC mak kazu inséndiu iha rua, anin-bo’ot estraga uma ida, rai-halai rezulta uma-kain ida hetan estragu, kazu inundasaun mak bee tama uma komunidade hamutuk 26.
Notísia relevante: APC identifika uma-kain 12 iha Usitasa’e sei hetan materiál konstrusaun
“Ne’ebé to’o agora ami rejista ona kazu 30, lihusi kazu sira-ne’e, APC rasik responde ona ho sasán hanesan, nesesidade bázika ho tipu ai-han no naun ai-han,” Komandante Operasionál APC Oé-Cusse, João Sila João Sila dehan ba jornalista sira iha Oé-Cusse, ohin.
APC destaka ona pesoál Komisaun Jestaun Dezastre Suku (KJDJ) iha kada suku, nune’e bele relata informasaun kona-ba dezastre naturál.
“Ami iha kolaborasaun servisu di’ak autoridade lokál sira, balun ami hetan husi lideransa suku, tanba iha kada suku ami destaka KJDS, ne’ebé iha momentu akontese dezastre naturál iha térrenu, ami sempre simu informasaun husi baze, no kontinua kedas halo intervensaun imediata,”nia informa.
Iha fatin hanesan, Xefe Suku Abani, Carlos Elo, orgullu tanba ho prezensa KJDS iha suku bele fasilita lalais komunidade sira ne’ebé vitima ba dezastre naturál.
“Durante ne’e, ami iha koordasaun di’ak, ezemplu iha suku Abani kuaze uma-kain 10 mak hetan inséndiu, ami sempre kontaktu ho APC no halo kedas atendimentu emerjénsia hanesan ohin akontese aban responde kedas, ne’ebé ha’u agradese tanba ekipa KJDS kontinua mantein iha suku hodi kontinua akompaña situasaun iha suku,” nia
Durante ne’e, APC apoia ai-han no la’os ai-han ba vítima dezastre naturál hanesan foos, supermie, susu lata, ikan-lata, foremungu, kafe no masin-midar no seluk inklui balde, lona, roupa no sasán dapur nian.
Notísia relevante:Protesaun Sivíl Oé-Cusse ho parseiru avália servisu atu hadi’a iha futuru
Jornalista: Abílio Elo Nini
Editor: Florencio Miranda Ximenes
