Protesaun Sivíl Oé-Cusse ho parseiru avália servisu atu hadi’a iha futuru
OÉ-CUSSE, 06 dezembru 2023 (TATOLI) – Autoridade Protesaun Sivíl (APC, sigla portugés) Rejiaun Administrativa Espesiál Oé-Cusse Ambeno (RAEOA), kuarta ne’e hala’o enkontru koordenasaun servisu hamutuk ho parseiru sira hodi avalia progresu servisu durante ne’e, atu prepara hadi’a iha futuru.
“Ohin ita realiza enkontru koordenasaun antes tama ba 2024, hanesan avaliasaun ida atu haree fila-fali progresu servisu durante ne’e halo ona atu prepara hadi’a iha futuru hodi serbí ba ita-nia komunidade sira iha Oé-Cusse,” Komandante APC, Inspetór Xefe Polísia, Herman Metan, ba jornalista sira hafoin enkontru koordenasaun.
Alende ne’e mós liuhosi enkontru koordenasaun ne’e, atu hametin lazu amizade entre parseiru sira, maihosi ONG lokál no ajénsia sira, nune’e iha komitmentu nafatin, hodi serbí komunidade, tanba Timor-Leste sei enfrenta problema mudansa klimátika.
Tán ne’e, parseiru sira hanesan, F-FDTL no PNTL, CVTL Oé-Cusse, DNPKK inklui servisu saúde hamutuk ONG sira, presiza nafatin kolaborasaun.
“Tanba bainhira mosu dezastre naturál, ita bele koordena instituisaun Estadu sira, halo asaun hamutuk ho ajénsia sira, entaun ohin ita enkontru ne’e atu avalia progresu servisu durante ne’e, atu deskuti hamutuk hodi mellora di’ak liután iha futuru,” nia informa.
Diretór ONG WN, Cornelio Ase, esplika, fenómenu ka la niña sei akontese anin no udan, enkuantu la ninu sei akontese bailoron naruk, sei afeta ba produsaun agrikultura inklui agrikultór sira enfrenta menus bee.
“Entaun liuhosi enkontru ne’e, ita bele fó hanoin ba malu, karik akontese ita bele identifika fatin ne’ebé maka menus bee, ita bele fornese, ita agradese tanba ONG PERMATIL eduka ona ita-nia abitante sira oinsá kuda bee, liuhosi halo terras atrasaun, entaun ohin ita-bele hamutuk atu haree asuntu ne’e, ita-bele distribui bee tanba agora fatin barak problema hela ho bee-moos,” nia katak.
Notísia relevante:SEPS husu Autoridade apoia rai konstrui eskritóriu Protesaun Sivíl iha Oé-Cusse
Jornalista: Abílio Elo Nini
Editór: Evaristo Soares Martins
