OÉ-CUSSE, 14 Novembru 2024 (TATOLI) – Autoridade Protesaun Sivíl (APC, sigla portugés) Rejiaun Administrativa Espesiál Oé-Cusse Ambeno (RAEOA) identifika ona vítima inséndiu ne’ebé afeta ba família 12 iha suku Usitasa’e sei hetan apoiu ba materiál konstrusaun, tanba konsidera uma sira ne’e tama iha kategoria aat totál.
Xefe Gabinete Apoia Emerjénsia APC Oé-Cusse, Amancio da Conceição, informa, tuir matadalan APC, bainhira atu hetan apoia ruma husi Governu iha kritéria tolu mak aat totál, kamaan no natoon.
“Ida-ne’e ami identifika ona tama iha tipu aat totál, ne’ebé vítima sira sei hetan materiál konstrusaun kompletu ba uma ida. Kuandu aat natoon bele hetan de’it zinku, kuandu aat natoon hetan de’it ai-han ruma. Maibé, ida-ne’e aat totál, entaun sei hetan uma ida, ne’ebé ami sei rekolla sira-nia dadus atu submete hotu ba nasionál hodi ita hein bainhira mak hetan apoiu”, Amancio da Conçeição relata iha ámbitu distribuisaun ai-han ba komunidade sira iha aldeia Buqui, ohin.
Notísia relevante: APC no parseiru apoia ona nesesidade bázika ba vítima inséndiu iha Usitasa’e
Nia dehan dadus ne’ebé APC persiza mak fixa família, kartaun eleitorál no importante liu mak sertifikadu rai no karik dokumentu sira-ne’e ahi han hotu, entaun persiza deklarasaun husi autoridade lokál sira, xefe suku ka xefe aldeia.
“Deklarasaun ne’e atu hatudu katak komunidae ida-ne’e nia dokumentu ahi han hotu iha insndíu ne’e. Agora, ami rekolla hela kuandu kompletu ona, ami sei hato’o ba nasionál atu haree, depois mak ita hein de’it apoiu iha tinan ne’e ka tinan oin”, dehan.
Xefe suku Usitasa’e, Tomás Ulan Colo, dehan inséndiu ne’e seidauk hatene klaru nia kauza no sei iha faze identifikasaun.
“Hori kalan ha’u mai hamutuk ho sira [vítima], balun dehan ahi mai husi li’ur mak de repente lakan hahú husi kakuluk, maibé agora ita haree nia kauza loloos ne’e tanba saida mak ahi han”, nia salienta.
Notísia relevante: Ahi han mutuk uma 12 iha Usitasa’e-RAEOA
Tuir dadus, inséndiu ne’e akontese iha loron kuarta pur volta tuku 17:30, ne’ebé afeta ba membru família 48 husi uma 12 lakon sira-nia rezidénsia no ferik ida hetan kanek no daudaun ne’e hala’o hela tratamentu iha Ospitál Referénsia Oé-Cusse.
Jornalista: Abílio Elo Nini
Editora: Maria Auxiliadora
