OÉ-CUSSE, 13 Novembru 2024 (TATOLI) – Pur volta tuku 17:30 loraik ne’e, ahi han uma 12, inklui uma lulik ida iha bairru Kuamna, aldeia Buqui, suku Usitasa’e, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA).
Agustinho Ola nu’udar sasin dehan ahi han uma iha loraik, maibé seidauk hatene kauza husi inséndiu ne’e rasik.
“Ohin kedas ha’u iha ne’e, akontese pur volta tuku 17:30. Uma 12, maioria uma kabuar, ahi han mutuk, inklui uma lulik ida. Agora ami tuur hamutuk ho inan-aman sira iha fatin akontesimentu atu buka nia kauza ba ahi ne’e mai husi ne’ebé, tanba ita seidauk hatene loloos”, Agustinho Ola informa ba Tatoli via telefone, ohin.
Xefe aldeia Buqui, Simão Quelo, hateten mós katak insidente halo vítima sira la konsege salva sasán, tanba ekipa bombeiru to’o atraza no abitante balun bá tiha to’os.
“Ohin konsege kontaktu parte bombeiru no sira mai, maibé to’o iha ne’e la konsege salva tanba ami mós kontaktu tarde tan, ne’ebé ai-han hotu sasán sira-ne’ebé iha uma laran, tanba komunidade sira mós barak bá to’os no fila mai uma mutuk ona”, nia haktuir.
Autoridade komunitária ne’e adianta katak akontesimentu ne’e rezulta família balun kanek tanba ahi mak han bainhira tenta atu salva sasán sira-ne’ebé iha uma laran.
Tanba ne’e, nia sei prepara pedidu atu submete ba iha parte autoridade RAEOA, liuliu Servisu Sosiál no Komisaun Jestaun ba Dezastre Naturál Rejiaun Oé-Cusse atu konsidera.
“Laiha ema ruma lakon vida, maibé iha balun kanek tanba tenta atu salva sasán mak ahi han. Ne’ebé to’o agora ami tuur hamutuk buka nia kauza loloos”, nia hateten.
Daudaun ne’e vítima sira hela provizoriamente ho viziñu sira.
Jornalista: Abílio Elo Nini
Editora: Maria Auxiliadora
