OÉ-CUSSE, 14 Novembru 2024 (TATOLI) – Vítima inséndiu uma-kain 12 iha bairru Kuamna, aldeia Buqui, suku Usitasa’e, sub-rejiaun Oésilo, simu ona apoiu nesesidade bázika husi Autoridade Rejiaun Administrativa Espesiál Oé-Cusse Ambeno (RAEOA), Autoridade Protesaun Sivíl (APC) no parseiru Krús Vermella Timor-Leste (CVTL) filiál Oé-Cusse no Programa Alimentár Mundiál (PAM).
Asesór ba Asuntu Sosiál, Agustinho Caet, hateten apoiu ne’e atu hakmaan netik sofrimentu vítima sira, liuliu nesesidade bázika no sasán dapur nian. “Governu mós lakohi taka matan, tenke urjentemente hatán imi-nia halerik ne’e”, Agustinho Caet dehan iha ámbitu distribui nesesidade bázika.
Agustinho Caet hato’o mós mensajen husi Prezidente Autoridade, Rogério Lobato, ne’ebé husu vítima sira atu mantein unidade no labele hirus-malu, labele deskonfia no duun-malu, tanba ne’e insidente no ema hotu la espera.
“Ami simu orientasaun no mensajen husi Prezidente Autoridade atu mai apoia sasán sira-ne’e. Ne’ebé, sasán ne’ebé ohin ami oferese ne’e ba konsumu hodi hein tan apoiu kontinuasaun no sasán sira-ne’e labele fa’an, maibé uza ba imi-nia nesesidade”, nia husu.
Xefe Gabinete Apoia Emerjénsia APC Oé-Cusse, Amancio da Conceição, espera ho apoia emerjénsia ne’e bele hakmaan netik komunidade sira hafoin hetan dezastre, tanba maioria la konsege salva ai-han no sasán seluk.
“Horisehik ami hetan kontaktu husi xefe suku no ekipa dezloka mai ho bombeiru, maibé la konsege salva imi-nia sasán balun. Situasaun sira hanesan ne’e akontese iha fatin-fatin. Ohin, ami mai lori de’it apoia emerjénsia hanesan food item no nonfood item. Ida-ne’e atu tulun imi tanba hetan susar hodi hein prosesu tuirmai tan, tanba iha haree uma barak kuaze la konsege salva sasán”, nia dehan.
Xefe suku Usitasa’e, Tomás Ulan Colo, reprezenta komunidade sira hato’o agradesimentu ba autoridade sira tanba apoia ona vítima sira atu hetan ai-han ruma, tanba uma 12 ne’e maioria uma-du’ut ne’ebé la salva ai-han no osan balun.
“Ha’u mós lori komunidade sira-nia naran husu deskulpa, karik akontesimentu horisehik komunidade ladún hatudu komunikasaun di’ak, liuliu bombeiru mai atraza, balun hakilar no trata maibé ida-ne’e tanba situasaun akontese de repente, halo ema hotu hirus”, nia hato’o.
Notísia relevante: Ahi han mutuk uma 12 iha Usitasa’e-RAEOA
Apoia ne’ebé fó mak hanesan foos, supermie, ikan lata, susu-been, biskuit, mina, kafé, masin-midar no ai-han seluk tan no la’ós ai-han mak bikan, kanuru, balde, lona, roupa, sabaun no seluk tan.
Jornalista: Abílio Elo Nini
Editora: Maria Auxiliadora
