DILI, 30 Juñu 2026 (TATOLI) – Jogadór suplente Brazil, Gabriel Martinelli, sai erói hafoin marka golu vitória iha tempu adisionál (minutu 90+5) hodi lori Brazil manán Japaun ho eskoru 2-1 iha Jornada 32 Kopa Mundiál 2026. Vitória dramátiku ne’e garante kedan hakat Seleção nian ba palku oitavu finál (jornada 16), enkuantu Japaun tenke simu realidade hodi fila sedu ba uma.
Jogu épiku entre nasaun rua ne’e hala’o iha tersa madrugada (oras Timor-Leste) iha Estádiu Houston, Estadu Unidu Amérika.
Bainhira apitu hahú, ekipa rua lansa kedan presaun maka’as ba malu. Japaun hatudu jogu ho velosidade aas no dudu bola ba oin hodi buka oportunidade iha lina defeza Brazil nian.
Ho tátika ne’ebé lais, Japaun konsege kria surpreza hodi hatama golu uluk:
- Minutu 29: Kaishu Sano marka golu hodi lori Japaun oin ho 1-0.
- Maski Brazil domina bola no tesi atake barak, sira susar tebes atu sobu defeza metin Samurai Blue.
- Eskoru 1-0 ne’e mantein to’o intervalu.
Segunda parte: Reasaun maka’as husi ‘ekipa samba’
Semo ba segunda parte, Brazil aumenta kualidade no ritmu atake. Avansadu Real Madrid, Vinicius Junior, halo kedan asaun perigu iha minutu 46, maibé nian suta konsege salva husi guarda-rede Japaun, Zion Suzuki, ne’ebé hatudu kualidade di’ak iha jogu ne’e.
Brazil kontinua dudu Japaun ba kotuk ho kruzamentu barak:
- Minutu 52: Bruno Guimaraes kabesa bola husi kruzamentu Danilo nian, maibé Suzuki halo fali reflexu exelente hodi para bola.
- Minutu 54: Casemiro kabesa bola besik baliza, maibé Takehiro Tomiyasu blokeia tiha iha lina golu nian.
- Minutu 56 (Golu!): Presaun Brazil nian ikus mai fó rezultadu. Gabriel Magalhaes halo kruzamentu naruk husi karuk ba poste dook, Casemiro ne’ebé hein hela iha ne’ebá kabesa de’it hodi halo eskoru empata 1-1.
Ho eskoru hanesan, Brazil mós aumenta entuziasmu. Vinicius Junior suta hatama tan golu iha minutu 59, maibé Suzuki dudu bola kona poste. Gabriel Martinelli ne’ebé tama nu’udar suplente mós kria oportunidade iha minutu 78 maibé bola sai de’it.
Drama iha minutu ikus (90+5)
Bainhira ema hotu hanoin jogu ne’e sei remata ho empata, kontra-atake mosu iha minutu ikus:
- Minutu 90+4: Fabinho nia kabesa semo sai
- Minutu 90+5 (Golu vitoria!): Bruno Guimaraes ne’ebé iha espasu di’ak atu suta, hili tátika matenek hodi pasa fali bola ba Gabriel Martinelli. Ho kalma, Martinelli dudu bola tama ba kantu kraik karuk husi baliza Suzuki nian. Brazil 2, Japaun 1.
Apitu finál rona, eskoru 2-1 la muda. Brazil selabra ho rezultadu hakat ba oitavu finál, no Japaun tenke reamata sira-nia jornada iha Kopa Mundiál 2026.
Alinamentu jogadór
Brazil:
Alisson Becker; Danilo, Marquinhos, Gabriel Magalhaes, Douglas Santos, Bruno Guimaraes, Casemiro, Lucas Paqueta, Rayan, Matheus Cunha, Vinicius Junior.
Japaun:
Zion Suzuki, Hiroki Ito, Takehiro Tomiyasu, Shogo Taniguchi, Daichi Kamada, Keito Nakamura, Ritsu Doan, Kaishu Sano, Daizen Maeda, Ayase Ueda, Junya Ito.
Jornalista: Hortêncio Sanchez
Editór: Rafael Ximenes de A. Belo
