OEKUSI, 29 Agostu 2025 (TATOLI) – Tribunál Judisiál Primeira Instánsia Oekusi, liuhusi Juiz Singulár, Evangelino Belo, hasai despaixu hodi aplika medida koasaun prizaun preventiva ba arguidu na’in-neen tanba komete jogu online ilegál rua, ba esplorasaun jogu ilísita kriminoza jogu online no burla informátika, ne’ebé instala husi empreza internasionál Seagull Resort husi Malázia iha otél Oé-Upun, Rejiaun Administrativa Espesiál Oékusi Ambeno (RAEOA).
Arguidu na’in-neen ne’e ho inisiál AS no RN husi Indonézia, LQ, AWX no YLXX husiXina no N.M husi Nepál.
Notísia relevante: PSIK ho SNI buska apreensaun no desmantela jogu online ilegál iha Oekusi
Prosesu Primeiru Interrogatóriu ne’e, Ministériu Públiku, reprezenta husi Prokuradór Mateus Nessi, promove arguidu sira ho krime esplorasaun jogu online ilísitu burla informátika no burla agravadu, ne’ebé previstu iha artigu 322, 268 no 269 Kódigu Penál Timor-Leste.
Nune’e, Tribunál konsidera iha indísiu forte. Enkuantu defeza ba arguidu sira, Octavio Cardoso, husu atu tetu medida koasaun ne’ebé Ministériu Públiku solisita ba tribunál.
Hafoin rona tiha parte rua, Juiz singulár, Evangelino Belo, tetu no deside aplika medida koasaun prizaun preventiva, bainhira parte rua la konkorda desizaun ne’e, tuir prazu loron-30 bele halo rekursu.
“Promosaun ba iha prosesu primeiru interrogatóriu durante loron rua, to’o ohin loron hetan rezultadu liuhusi despaixu tribunál nian, ho faktu oinoin ne’ebé mak tribunál konsidera, ho ida-ne’e hanesan mandatáriu ba iha prosesu ida-ne’e, aplika medida koasaun prizaun preventiva ba arguidu sira, ne’ebé ha’u mós iha devér no obrigasaun atu hatama rekursu iha loron lima nia laran,” Advogadu Privadu, Octavio Cardoso, dehan iha tribunál Oekusi, ohin.
Notísia relevante:PSIK aprezenta ona detidu na’in-neen iha tribunál Oekusi ba primeiru interrogatóriu
Audénsia julgamentu ne’e, prezide husi husi Juiz Singulár Judisiál Primeira Instánsia Oekusi, Evangelino Belo, Ministériu Públiku reprezenta husi Prokuradór Mateus Nessi no José Elo.
Arguidu na’in-neen hetan asisténsia legál husi Advogadu Privadu João Ndun no Octavio Cardoso no Defensór Públiku Estaqui Guterres.
Entretantu, tuir orariu, arguidu sira sei dezloka ba prizaun Bekora, iha loron sábadu, 30 Agostu 2025.
Rekorde fali katak, kazu ne’e akontese iha loron segunda kalan, 25 Agostu 2025, tanba buska no apreensaun husi ekipa Polísia Siéntifika Investigasaun Kriminál (PSIK), hamutuk ho Serbisu Nasionál Intelejénsia (SNI) iha otél Oé-Upun.
Ekipa konjunta konsege deskobre kazu kriminál rua hanesan, esplorasaun jogu ilísita kriminoza jogu online no burla informátika, redi scam call center transnasionál, ne’ebé instala husi empreza internasionál Seagull Resort husi nasaun Malázia iha otél Oé-Upun.
Notísia relevante:PSIK ho SNI monta ona liña polisiál ba eskritóriu rua iha otél Oé-Upun
Jornalista: Abílio Elo Nini
Editór: Evaristo Soares Martins
