DILI, 23 Maiu 2025 (TATOLI) — Ministru Obra Públika, Samuel Marçal, fó-sai katak, tempu badak komunidade afetada ba alargamentu estrada husi diresaun Kuluhun to’o Bekora, ho totál uma-kain 20 simu indeminizasaun tanba asina ona karta termu aseitasaun.
Nia esplika, komunidade afetada alargamentu estrada husi Kuluhun to’o Bekora parte Kuluhun nian iha fulan kotuk uma-kain 51 asina ona termu aseitasaun, maibé balu dokumentu la kompletu, konta bankária sala, entaun balu ne’ebé loos iha fulan ne’e lae fulan oin hetan indemnizasaun.
“Balu ne’ebé dokumentu loos ona hamutuk uma-kain 20-resin, ha’u foin asina haruka ona ba finansa atu halo indeminizasaun, restu ne’e seidauk tanba sei kompleta lai dokumentu,” Samuel Marçal, ba Tatoli, iha Palásiu Governu, Dili.
Nia esplika, realsiona indemnizasaun ba komunidade afetadu despezu administrativu iha Fomentu II, Pasar Senggol- Bidau, Bidau Santa-Ana, no Bebonuk, antes ne’e Bidau Senggol no Fomentu II uma-kain 325 nian, restante seidauk tanba balu fallansu iha dokumentu.
“Maibé foin lalalis ha’u cuti tiha foin tama ne’ebé, ha’u seidauk konfirma ho parte finansa,” nia dehan.
Lembra katak, iha 16 Abríl 2025, MOP liuhusi Diresaun Nasionál Planeamentu, Peskiza no Dezenvolvimentu ho família afetada sira asina ona termu aseitasaun.
Iha termu aseitasaun ne’e kustu estimasaun ne’ebé MOP prevee boot liu rihun $15 no ki’ik liu $500 (ida ne’e ba barraka sira).
Orsamentu ne’ebé tinan ne’e MOP prevee halo indemnizasaun ba despeju administrativu no alargamentu Estrada hamutuk millaun $2.
Notísia relevante : https://tatoli.tl/2025/04/16/uma-kain-325-iha-fomentu-ii-no-bidau-simu-ona-indemnizasaun/
Jornalista : Arminda Fonseca
Editór : Evaristo Soares Martins
