VIKEKE, 19 Novembru 2025 (TATOLI)—Kondutór transporte públiku Munisípiu Vikeke, João Soares, husu Governu liuhusi Ministériu Transporte no Komunikasaun (MKT) konstrui estasionamentu (terminál) ba transporte públiku sira iha Munisípiu Vikeke.
“Iha Munisípiu Vikeke kuaze tinan barak ona Governu seidauk kria terminál ba transporte públiku sira. Tanba ne’e, ami ezije ba Governu hodi konstrui terminál, atu ami bele uza hodi tula pasajeiru sira,” João Soares ba jornalista sira iha Postu Vikeke Vila, Kuarta ne’e.
Tuir kondutór ne’e katak estasionamnetu laiha sei difikulta transporte públiku hodi hetan rendimentu, nune’e kada loron transporte sira dalaruma hetan $100 mai kraik de’it.
“Tanba laiha terminál, bus la para. Entaun, pasajeru laiha ne’ebé sai dezafiu ba ami. Maski kada tinan ami selu ba Diresaun Nasionál Transporte Terrestre (DNTT), maibé Governu seidauk kria terminál ba ami. Ami-nia hakarak Governu aselera konstrui terminál atu ami bele hetan rendimentu,” nia prefere.
Iha fatin hanesan, Diretór DNTT Munisípiu Vikeke, Saul Henrique rekoñese Munisípiu Vikeke seidauk iha fatin estasionamentu ba transporte públiku sira, tan ne’e difikulta mós DNTT hodi halo kontrolu ba transporte sira.
Atu kontrola transporte públiku sira-ne’e, tuir nia, tenke iha fatin terminál, nune’e prevene transporte (bus) sira-ne’e tama aldeia no suku sira, tanba transporte sira hanesan anguna labele hetan rendimentu.
“Atu konstrui terminál, desizaun la’ós husi ha’u maibé husi nasionál. Ami aprezenta ona asuntu ne’e ba nasionál no autoridade munisípiu. Espera ba futuru ne’e bele konstrui terminál,” nia tenik.
Jornalista: Vitorino Lopes da Costa
Editór: Xisto Freitas da Piedade
