DILI, 17 Setembru 2025 (TATOLI) – Liga Futeból Femeninu Timor-Leste (LFF-TL, sigla portugés) Primeira Divizaun époka 2025-2025 abertura iha 27 Setembru semana oin.
Koordenadór jerál LFFTL, Janio Tilman, esplika, Federasaun Futeból Timor-Leste (FFTL) liuhosi Asosiasaun Futeból Femeninu Timor-Leste (AFFTL) tuir planu sei abertura kompetisaun LFFTL iha Setembru bainhira remata faze apuramentu nune’e kompleta klubu sanulu iha primeira divizaun.
“Fulan-ne’e laran hafoin faze apuramentu remata kontinua kedas ho reuniaun tékniku hodi prepara serimónia abertura iha loron-27 Setembru,” Janio Tilman informa ba TATOLI iha edifísiu FFTL Bairro dos Grilhos, kuarta ne’e.
Janio Tilman relata, planu primeira divizaun LFFTL sei partisipa klubu sanulu kompostu segunda divizaun rua no ualu husi primeira divizaun ne’ebé aplika sistema full kompetisaun ho tótal jogu hamutuk 90.
Komisaun organizadora deside sei halo abertura iha fulan-ne’e to’o marsu 2026, ne’ebé alokasaun orsamentu rihun $200 hodi halo preparasaun ba jogu hotu durante realiza kompetisaun.
“Ita-nia preparasaun hahú ona iha fulan-jullu, nune’e ita hakarak primeira divizaun ne’ebé sistemátiku no profesionál,” Janio akresenta.
Entretantu, klube ualu ne’ebe serteza ona kompete iha iha primeira divizaun hanesan; Buibere FC, AD-SLB, S’amuser FC, Maranatha FC, FC Kulugisa, Akademika FC, UNITAL FC no Maudoko FC.
Enkuantu, klubu tolu hanesan São José, VDL no Na’in-Feto sei liuhosi faze apuramentu hodi deside klubu rua hakat ba primeira divizaun LFFTL époka 2025-2026.
Kampionatu Futeból Feto Timor 2025
Liga Futeból Feto Timor-Leste (LFF-TL) 2025 sei sai hanesan edisaun ofisiál ba da-5 husi Kampeonatu Futeból Feto Timor-Leste nian. Organiza hosi Federasaun Futeból Timor-Leste no sei konta ho klubu ualu ne’ebé partisipa iha primeira divizaun.
Jogu dahuluk époka nian sei hala’o iha loron 22 fulan-Agostu. Janela rejistu klube nian fó-sai iha loron 17 fulan-Juñu.
Ekipa Sport Laulara e Benfica maka atuál kampeaun defeza, tanba sai hanesan kampeaun dala-rua iha époka 2023-2024.
Sistema Disputa
Divizaun dahuluk sei iha ekipa partisipante klubru 10. Ekipa sira joga iha formatu uma-no-sai. Kampeaun sei sai ekipa ne’ebé hetan pontu barak liu iha finál hosi kalendáriu jogu nian.
Kritériu sira
Karik klube rua ka liu empata iha pontu, kritériu tékniku sira tuirmai sei aplika tuituir malu:
- rezultadu konfrontu diretu
- diferensa golu ne’ebé aas liu
- númeru golu sira-ne’ebé maka marka aas liu
Ekipa sira-ne’ebé partisipa
Klube lima ne’ebé di’ak liu hosi Primeira Divizaun 2023-2024 no mós kampeaun hosi Segunda Divizaun sei partisipa iha edisaun ida-ne’e. Maibé, iha loron 12 fulan-setembru tinan 2025, FFTL fó-sai katak ekipa sira hosi Unital FC no FC Kulugisa Baucau hetan mós konvite ba primeira divizaun, ne’ebé hetan reestruturasaun no sei inklui mós klube adisionál rua hosi segunda divizaun, ne’ebé sei partisipa iha torneiu kualifikasaun ida.
Notísia relevante: São José FC garante hakat bá primeira divizaun Liga Futeból Feminina Timor-Leste
Jornalista : Natalino Belo
Editór : Evaristo Soares Martins
