DILI, 08 Jullu 2026 (TATOLI)–Governu Austrália louva reputasaun pozitivu ne’ebé harii husi traballadór Timor-Leste liuhusi eskema Mobilidade Traballu Pasífiku Austrália (PALM), ne’ebé dezde lansamentu iha tinan 2012 haruka ona traballadór hamutuk 25.366 ba setór oioin iha Austrália.
“Susesu ida-ne’e reflete imi-nia servisu maka’as, abilidade, determinasaun, reziliénsia no prontidaun hodi reprezenta Timor-Leste iha rai-li’ur. Imi hotu tenke orgullu ho konkista ida-ne’e,” Apresiasaun ne’e hato’o husi Adjuntu Embaixadór Austrália nian iha Timor-Leste, Edward Wilkinson, iha serimónia despedida ba traballadór Timor-Leste na’in-135 ne’ebé aranka ba Austrália iha Otél Palm Springs, Fatuhada, Dili, kuarta-feira ne’e.
Nia afirma, Austrália valoriza tebes ninia parseria ho Timor-Leste no programa mobilidade traballu hanesan ezemplu ida-ne’ebé vizivel liu kona-ba susesu kooperasaun entre nasaun rua ne’e.
Dezde tinan 2012, nia informa, timoroan liu 25.000 mak servisu iha Austrália no ho sira-nia dedikasaun, profisionalizmu, no étika serbisu harii ona reputasaun exelente ida ho empregadór australianu sira, hodi loke tan oportunidade ba traballadór timoroan rihun ba rihun sira seluk.
“Austrália orgullu servisu hamutuk ho SEFOPE hodi kontinua habelar oportunidade hirak ne’e. Ita fahe vizaun ida hodi hasa’e partisipasaun forsa traballu, loke oportunidade foun no garante traballadór sira fila-fali mai Timor-Leste ho abilidade, esperiénsia, no oportunidade ne’ebé bele fó benefísiu ba sira-nia família, komunidad, no dezenvolvimentu nasaun nian iha futuru,” nia dehan.
Edward hatuta, tan katak Austrália no Timor-Leste fahe kompromisu hamutuk atu kontinua kria oportunidade serbisu barak liután, hadi’a abilidade forsa traballu nia, no loke oportunidade ekonómika foun ba traballadór sira bainhira sira fila ba uma.
Iha fatin hanesan, Sekretáriu Estadu Formasaun Profisionál no Empregu (SEFOPE), Rogério Araújo Mendonça, afirma katak to’o loron 07 fulan-Jullu tinan 2026, númeru traballadór Timor-Leste ne’ebé haruka ba Austrália liuhusi Programa PALM atinei ona 25.366.
Traballadór sira-ne’e hotu hetan rekrutamentu liuhusi ajénsia rekrutamentu hamutuk 150 ne’ebé servisu hamutuk ho empreza no to’os na’in hamutuk 398 iha Austrália.
Husi totál ne’e, 9,932 mak traballadór foun sira, enkuantu 15,404 mak traballadór sira-ne’ebé fila, tuir dadus atualizadu to’o 07 Jullu 2026.
Iha tinan 2026 de’it, SEFOPE hateten, traballadór 2.449 maka sai ona ba Austrália, ne’ebé kompostu husi traballadór foun hamutuk 833 (mane 680 no feto 153) no traballadór sira-ne’ebé fila fali hamutuk 1.616 (mane 1.187 no feto 429).
Nia revela mós katak Timor-Leste nu’udar nasaun ho dezempeñu di’ak-liu iha rejiaun Ázia-Pasífiku iha implementasaun igualdade jéneru iha Programa PALM.
“Timor-Leste hetan fatin dahuluk iha rejiaun Ázia-Pasífiku iha termu sira igualdade jéneru nian iha Programa PALM. Ne’e hatudu katak feto sira-nia partisipasaun iha programa ne’e konsege ona hatán ba nesesidade sira husi merkadu traballu nian iha Austrália,” nia esplika.
Maske nune’e, Rogério rekoñese katak iha nafatin dezafiu iha forma kazu fugaun, iha ne’ebé traballadór sira sai husi sistema ka sira-nia kontratu ofisiál traballu.
Nia dehan, maioria kazu sira-ne’e akontese durante pandemia COVID-19, bainhira traballadór liu 800 mak sai husi sistema.
Iha sirkunstánsia normál, traballadór balu hili atu husik sira-nia kontratu tanba períodu serbisu fulan neen ne’ebé promete dura de’it besik fulan hitu to’o ualu tanba tempu kolleta ramata.
“Maibé, kompara ho nasaun sira seluk iha rejiaun Ázia-Pasífiku, númeru husi traballadór sira Timor-Leste nian ne’ebé sai husi sistema sei ki’ik tebes,” nia hateten.
Nia mós aprezenta dadus kona-ba traballadór mate durante Programa PALM dezde 2012, husi totál traballadór hamutuk 25.366 ne’e mate hamutuk ema na’in-36 ne’ebé kompostu husi mane na’in-21 no feto na’in-15.
Husi sira-ne’e, traballadór balun mate hafoin fila mai Timor-Leste, enkuantu traballadór na’in-10 mate iha Austrália inklui na’in rua hetan asidente.
Nia subliña, mate-isin traballadór sira-ne’ebé mate iha Austrália repatriadu hotu ona mai Timor-Leste no entrega ona ba sira-nia família.
“Kompara ho totál traballadór liu 25.000 ne’ebé mak partisipa ona iha programa ne’e, númeru ne’e relativamente kiik. Maske nune’e, Governu iha nafatin kompromisu hodi hadi’a protesaun no seguransa ba traballadór migrante Timor-Leste tomak iha Austrália,” Rogério dehan.
Jornalista : Felicidade Ximenes
Editór : Cancio Ximenes
