SMAPPF Vikeke apoia tratór boot ba agrikultór Uatulari hodi fila-rai
VIKEKE, 28 Setembru 2026 (TATOLI)—Servisu Ministériu Agrikultura, Peska, Pekuária no Floresta (SMAPPF) Munisípiu Vikeke hahú apoia tratór boot ba agrikultór sira iha Uatulari hodi fila-rai.
“Agora daudaun ne’e ita hahú apoia tratór boot rua iha Postu Administrativu Uatulari hodi fasilita ita-nia agrikultór sira fila-rai. Tanba agora tempu bailoron ona, entaun ita ajuda sira para fila-rai atubele kuda buat ruma iha tempu udan,” Xefe Departamentu Estensaun Agrikultura SMAPPF Munisípiu Vikeke, Feliciano Soares, ba TATOLI iha Postu Vikeke Vila, Segunda ne’e.
Feliciano esplika agora tratór fila-rai iha parte Samarogo nian hamutuk ektare tolu (3).
“Depoiz ektare tolu ne’e fila hotu tiha mak koloka fali ba agrikultór seluk ne’ebé presiza fila-rai,” nia tenik.
Nia subliña fila-rai agora daudaun ne’e agrikultór sira mak sosa rasik konbustivel enxe ba tratór tanba daudaun ne’e SMAPPF Vikeke seidauk iha konbustivel.
“Atu fila-rai tenke halo pedidu no lutu tenke di’ak, hafoin tratór boot bele ba fila-rai, nune’e bainhira fila-rai hotu udan-been monu rai komunidade bele kuda buat ruma iha toos laran,” nia akresenta.
Tuir dadus, SMPPAF Munisípiu Vikeke iha tratór boot ho kondisaun di’ak hamutuk unidade 11—tratór boot tuan iha unidade lima no foun iha unidade neen (6).
Jornalista: Vitorino Lopes da Costa
Editór: Xisto Freitas da Piedade
