KFP halo formasaun karáter ba funsionáriu públiku 176

ERMERA, 28 Setembru 2026 (TATOLI) – Komisaun Funsaun Públika (KFP) no FALINTIL-Forsa Defeza Timor-Lest  (F-FDTL) halo abertura ba formasaun karáter turma II períodu 2026  ba funsionáriu hamutuk 176  husi liña ministeriál no instituisaun públika sira.

Atividade ne’e ho tema “Dezenvolve funsionáriu ho karáter forte no integridade ba dignidade ho imajen instituisaun Estadu” ne’ebé hala’o iha kampu Igreja Parókia Postu Administrativu Letefoho, munisípiu Ermera, ohin, ne’ebé hahú ho hasa’e bandeira nasionál no formatura.

Prezidente KFP, Agostinho Letêncio de Deus, hatete formasaun ne’e hanesan kontinuasaun ba funsionáriu sira iha administrasaun públika ho objetivu mak atu país iha hela faze konstrusaun Estadu, la ezije de’it ema nia matenek no númeru funsionáriu, maibé importante liu mak ezije karáter funsionáriu sira-nian.

Tuir nia, iha prosesu konstrusaun Estadu iha influensia oioin hanesan país demokrátiku ne’e bele hamosu dezafiu oioin liuhusi penetrasaun ba valór sira liberdade ne’ebé hetan.

“Entaun, saida mak halo ita liuhusi balansu demokrasia ho administrasaun públika, ne’e mak karáter. Ida-ne’e disiplina ho atendimentu ne’ebé administrasaun públika ida tenke hala’o”, nia hatete hafoin halo abertura.

Nia salienta katak karáter sai hanesan baze fundamentál hodi halo balansu entre prinsípiu liberdade ba demokrasia ne’ebé país hetan ho maneira atendimentu, lealdade ierárkia no serbí. Tanba ne’e, ho programa Governu nian ba reforma administrasaun públika foti asuntu karáter sai prinsipál iha dezenvolvimentu administrasaun públika.

Nia salienta katak formasaun ne’e hakarak kontinua dezenvolve valór no prinsípiu eroi no mártir sira ne’ebé husik hela durante tinan 24 ultrapasa funu ida-ne’e, tanba iha prinsípiu ida mak sira-nia karáter no disiplina.

“Ohin, ita hakarak valór sira ne’e mak kuda metin fali ba funsionáriu sira, tanba ne’e Komisaun Funsaun Públika serbisu hamutuk ho F-FDTL atu dezenvolve duni karáter ne’ebé bazeia duni ba prinsípiu fundamentál Timor-Leste nian”, nia dehan.

Formasaun ne’e sei hala’o durante semana rua iha aula no semana ida tun bá kampu iha área abertu ho aprende sobre mentalidade reziliente.

Matéria husi instrutór no oradór sira mak kona-ba introdusaun formasaun karáter no dezenvolvimentu pesoál hodi respeita ba an rasik no ema seluk, onestidade, responsabilidade no jestaun komunikasaun, étika, integridade patriotizmu no nasionalizmu.

Aleinde ne’e, devér no direitu iha administrasaun públika atu fó hanoin fali kona-ba devér jerál no espesiál sira hodi hametin konfiansa komunidade nian ba administrasaun públika, ho valór fundamentál sira hanesan lealdade, obediensia, sijilu, asiduidade no pontualidade sai hanesan pilár prinsipál.

Aleinde prosesu administrativu disiplinár, eskala pena no aplikasaun iha administrasaun públika, ho objetivu atu fó kompriensaun kle’an kona-ba legalidade no konsekuénsia husi violasaun disiplina iha serbisu fatin.

Formasaun ne’e mós kona-ba jestaun tempu, katak abilidade atu jere no kontrola tempu ho efisiente sei hasa’e efetividade, produtividade no kria balansu ne’ebé diak iha knaar loroloron.

Formasaun ne’e mós inklui aprinde istória Timor-Leste ho espíritu no profisionalizmu no iha mós atividade sesaun ezersísiu fíziku ho seluk tan. ”

Iha fatin hanesan, Ministru Justisa, Sérgio Hornai, sauda votu konfiansa ba serbisu kooperasaun instituisionál hodi realiza programa ne’e hodi kontribui ba vizaun boot Estadu nia ba dezenvolvimentu instituisionál.

Nia afirma katak formasaun ne’e importante atu forma komportamentu no abilidade hodi eleva karáter servidór Estadu nian atu hetan kualifikasaun ida di’ak, liuliu serbisu públiku Estadu nian.

Majór Jenerál F-FDTL, João Miranda “Aluc”, agradese ba KFP ne’ebé fó fiar nafatin ba forsa armada hodi kontinua atividade referida.

Nia konsidade atividade ne’e importante atu formadu sira ka’er metin nafatin prinsípiu eroi no martir sira-nia uluk defende kauza país nian ba libertasaun pátria. Nune’e serbidór Estadu tenke ho lealdade no kompaixaun serbí Estadu ba dezenvolvimentu nasaun, liuhusi karáter serbí ho loloos.

Serimónia abertura formasaun ne’e partisipa husi Vise-Ministra Negósiu Estranjeiru no Kooperasaun (MNEK), Jesuína Gomes, Prezidente Autoridade Munisípiu Ermera, José Martinho dos Santos Soares, autoridade postu no líder komunitáriu, reprezentante liña ministeriál no instituisaun públika no konvidadu sira seluk.

Lembra katak programa formasaun faze dahuluk realiza ona ba funsionáriu hamutuk na’in-176 husi liña ministeriál no instituisaun públika sira.

Jornalista: Nelson de Sousa

Editora: Maria Auxiliadora