Ian Martin sei lansa filme istória ‘Rezisténsia Timor-Leste 1974 – 1999’
DÍLI, 28 Setembru 2026 (TATOLI) — Reprezentante Espesiál Sekretáriu-Jerál Nasaun Unida (ONU) bá Konsulta Populár iha Timor-Leste no Xefe Misaun UNAMET iha 1999, Ian Martin, hamutuk ho delegasaun, Segunda ne’e, hasoru Primeiru Ministru Kay Rala Xanana Gusmão, hodi aprezenta filme badak kona-ba istória Rezisténsia Timor-Leste entre tinan 1974 no 1999.
Filme ne’e sei lansa ofisialmente iha Timor Plaza, Dili, iha loron Tersa (29/09).
Filme dokumentáriu ne’e sei konta istória luta Timor-Leste liuhusi frente tolu – armada, diplomátika no klandestina.
Ian Martin hateten katak nia kontente tanba bele fila mai Timor-Leste. Nia hato’o ninia agradese ba Governu, liuliu Gabinete Primeiru-Ministru no Prezidente Repúblika, tanba fó oportunidade ba nia atu halo enkontru ho lideransa sira.
“Ha’u mai hodi aprezente filme badak kona-ba istória rezisténsia Timor-Leste nian,” Ian Martins ba jornalista sira hafoin hasoru PM Gusmão, iha Palasiu Governu, ohin.
Nia dehan objetivu prinsipál husi filme ne’e mak atu haktuir ba ema hotu hodi koñese saida mak akontese iha Timor husi tinan 1974 to 1999 – husi frente armada, diplomátika no klandestina.
Ian Martin salienta katak filme ne’e mós atu fó hanoin fali ba povu Timor-Leste, liuliu jerasaun foin-sa’e, kona-ba istória no akontesimentu importante sira ne’ebé akontese durante períodu luta ba restaurasaun independénsia.
Ian Martin hateten katak produsaun filme ne’e hala’o liuhusi kolaborasaun entre nia ekipa, Gabinete Primeiru-Ministru no Arkivu no Muzeu Rezisténsia Timorense (AMRT).
Nia subliña katak filme ne’e sei oferese ba povu Timoroan tomak hodi komprende istória rezisténsia nasaun nian.
Hafoin lansamentu, filme ne’e sei espalla ba munisípiu hotu no fahe mós ba nasaun seluk.
“Ami mós planeia atu fó sai filme ne’e liuhusi mídia konvensionál, inklui Rádio Televizaun Timor-Leste (RTTL), atu povu tomak bele asesu no haree filme ne’e,” nia hateten.
Jornalista: Alexandra da Costa
Editór: Cancio Ximenes
