DILI, 11 Jullu 2026 (TATOLI) – Jogadór suplente Mikel Merino, ne’ebé substitui Dani Olmo iha minutu 86, marka golu vitória iha minutu 88 hodi fó España manán 2-1 hasoru Béljika no lori La Furia Roja avansa bá meia-finál Kopa Mundiál 2026.
Vitoria ne’e lori España tenke hasoru Fransa iha meia-finál hodi hadau malu ba finál Kopa Mundiál tinan ida-ne’e.
Bainhira apitu dahuluk lian, España domina bola dezde inísiu no la fó oportunidade ruma ba Béljika atu dezenvolve sira-nia jogu.
España luta kria oportunidade sira ne’ebé klara iha baliza belga nia oin. Oportunidade dahuluk mosu iha minutu 2, bainhira Lamine Yamal halo suta ida husi dook, maibé la kona iha alvu.
Empate ne’e kotu iha minutu 30 bainhira Fabian Ruiz marka golu ba España. Atake españól nian hahú husi sorin-loos, lidera husi Pedro Porro, ne’ebé halo kruzamentu ba área penalidade. Suta dahuluk husi Dani Olmo salva husi guarda-rede Béljika, Thibaut Courtois, maibé Ruiz aproveita rebote hodi fó vantajen 1-0 ba España.
Minutu lima liu tiha, Yamal kuaze duplika vantajen España nian bainhira nia suta livre no obriga Courtois atu salva no soe bola ho liman. Iha minutu 40, Yamal hetan oportunidade di’ak atu aumenta golu, maibé nia suta sai dook husi baliza.
Béljika konsege halo empata iha nia oportunidade dahuluk ba golu iha minutu 41. España la konsege kontrola atake belga nian iha liña karuk, no Timothy Castagne lansa bola ida ba kaixa penalidade. Charles De Ketelaere simu bola no remata ho kabesa, ne’ebé la fó oportunidade ba guarda-rede España no bola tama ba rede hodi muda pontu ba 1-1.
Score mantein 1-1 to’o intervalu no laiha tan golu seluk ne’ebé akontese, maski España halo presaun maka’as. España kontinua domina iha segunda parte. Yamal iha oportunidade iha minutu 52 bainhira nia lansa suta ida ba dahuluk ne’ebé la to’o ba alvu.
Liutiha minutu rua, to’o ona Béljika nia turnu hodi ameasa, tanba Maxim De Cuyper mosu husi kotuk iha poste dook no suta ba dook.
Yamal ameasa baliza belga nian iha minutu 61 bainhira halo suta ida ba poste dook, maibé Courtois konsege blokeia.
Iha minutu 62, Kevin De Bruyne hetan oportunidade atu marka golu ba Béljika, hafoin aproveita falla ki’ik ida iha apuramentu defeza España nian. Nia remata ho suta ida, maibé hetan kaer husi Simon.
Liutiha minutu ida, baliza Béljika nian hetan ameasa bainhira Oryazabal suta husi ángulu apertadu ne’ebé Courtois konsege trava. Infelizmente, Courtois tenke troka iha minutu 71 tanba estraga oportunidade.
España troka Nico Williams no Mikel Merino hodi hadi’a sira-nia atake iha minutu 10 husi restu jogu nian.
Iha minutu 84, De Bruyne suta husi distánsia no iha oportunidade klara ida, maibé Rodri hasai bola lalais hodi salva España.
Merino, Jogadór Arsenal nian marka fali golu hanesan suplente, dala ida ne’e iha minutu 88. Pau Cubarsi nia suta husi área penalidade nia li’ur la hetan salvasaun tomak husi Lammens, no Merino ho lalais rebote ba rede.
Béljika koko atu ataka iha minutu hitu ne’ebé restu iha tempu lezaun nian, maibé sira-nia esforsu sai saugati tanba España manán nafatin ho 2-1 no avansa ba meia-finál.
Alineasaun ba jogadór nasaun rua:
España
Unai Simon; Pedro Porro, Pau Cubarsi, Aymeric Laporte, Marc Cucurella; Rodri, Fabian Ruiz (Pedri 55′); Lamine Yamal, Dani Olmo (Mikel Merino 86′), Alex Baena (Ferran Torres 55′); Mikel Oyarzabal (Nico Williams 79′).
Béljika
Thibaut Courtois (Senne Lammens 71′); Timothy Castagne, Nathan Ngoy, Brandon Mechele, Maxim De Cuyper (Joaquin Seys 18′); Hans Vanaken (Romelu Lukaku 60′), Nicolas Raskin; Leandro Trossard (Axel Witsel 60′), Kevin De Bruyne, Jeremy Doku; Charles De Ketelaere.
Jornalista: Hortêncio Sanchez
Editora: Maria Auxiliadora
