DILI, 22 maiu 2019 (TATOLI)—Ekipa Tékniku Ministériu Defeza kompostu hosi kargu xefe sira hahú deskuti ona programa Planu Estratéjiku Ministériu Defeza nian ba tinan 2019-2023.
Diskuasaun ne’e hala’o durante loron tolu hahú hosi 22-24 maiu 2019 hodi aprezenta fali proposta ida kompletu ba Ministru Defeza, Filomeno da Paixão de Jesus atu haree depois sei lori ba Ministériu Finansa atu deskuti kle’an.
“Ohin ami hahú deskuti programa prioridade ba tinan 2019, 2020 to’o 2023, ne’ebé sei foku liu-ba moris-di’ak forsa nian tuir polítika VIII Governu,” Diretór Jerál Ministériu Defeza, Armindo Moniz dos Santos ba Agência Tatoli iha salaun enkontru Ministériu Defeza, Fatuhada, Dili, ohin.
Nia tenik, preparasaun ba planu sira ne’e tenke deskuti agora hodi prevee orsamentu, nune’e to’o tinan 2023 ministériu bele ezekuta ninia orsamentu tuir objetivu planu asaun anuál.
Iha planu VIII Governu nian, Ministériu Defeza tau konsiderasaun maka’as atu fó apoiu ba instituisaun FALINTIL-Forsa Defeza Timor-Leste (F-DTL) iha rekursu umanu no hadi’a kondisaun infraestrutura bázika atu dezenvolve forsa la’o di’ak liu-tan.
Kona-ba totál orsamentu Ministériu Defeza nian ba tinan 2020, diretór ne’e dehan, seidauk hatene serteja, tanba foin hahú deskuti ba preparasaun hodi haree tuir proposta ne’ebé iha foin desidi orsamentu.
Iha deskusaun loron tolu ne’e, ekipa deskuti mós dezafiu no programa sira ne’ebé la kosege ezekuta hodi fórmula proposta ida di’ak tuir programa prioridade sira ne’ebé sei aprezenta fali ba Ministru Defeza hodi hato’o tutan ba Ministériu Finansa no Unidade Planeamentu Monitorizasaun no Avalisaun (UPMA), depois sei aprezenta ba Konsellu Ministru atu aprova.
Jornalista : Eugénio Pereira
Editór: Xisto Freitas
