DILI, 17 agostu 2023 (TATOLI) – Arguidu na’in-neen ne’ebé suspeita envolve ba kazu konfrontu depois graduasaun PSHT iha Tibar, Tribunál aplika medida koasaun Aprezentasaun Periódika (AP). Arguidu hirak ne’e ho insiál JG, LJG, RS, NR JC no ASS.
Liuhosi despaixu ikus hosi Juiz Turnu, Juiz Alvaro Maria Fátima, deside aplika medida koasaun AP ba arguidu sira, tanba laiha indísiu forte hatudu katak arguidu sira mak envolve iha krime konfrontu obstrusaun autoridade no danu agravadu ne’ebé Ministériu Públiku promove ba arguidu sira.
Hosi despixu ikus AP, arguidu sira aprezenta aan iha Tribunál Judisiál Primeiru Instánsia Dilí fulan ida dala ida.
“Tribunál aplika Aprezentasaun Periódika ba arguidu sira tanba la iha faktu sufisiente. Tanba laiha testamuña ida atu mai deklara katak arguidu sira ne’e mak halo perturbasaun polisiál no sira ne’e mak halo krime danu hodi estraga sasan patrimóniu Estadu hanesan karreta tanba ne’e mak Tribunál deside aplika medida koasaun Aprezentasaun Periódika ba arguidu sira”, Defeza arguidu sira, Defensór Públiku José Guterres hateten ba jornalista iha Tribunál Dili, kinta ne’e.
Nia dehan, hanesan defeza aseita ho desizaun hosi Tribunál ne’ebé aplika media AP ba nia kliente sira.
Enkuantu arguidu na’in-neen ne’e submete ba interogatóriu dahuluk iha Tribunál Judisiál Primeiru Instánsia Díli, kuarta horseik.
Iha prosesu interogatiróriu, Ministériu Públiku ne’ebé reprezenta hosi Prokuradór Domingos Barreto, promove arguidu sira ho krime obstrusaun autoridade ne’ebé previstu iha artigu 253 no danu agravadu ne’ebé previstu iha artig 243 hosi Kódigu Penál Timor-Leste.
Perante interogatóriu dahuluk, Ministériu Públiku, Prokuradór Domingos Barreto iha nia alegasaun husu Tribunál atu foti medida koasaun ba arguidu sira tuir Tribunál nia konviksaun bazea ba promosaun krime ne’ebé Ministériu Públiku promove ba arguidu sira.
Entratantu, rekorda fali katak arguidu na’in-neen, PNTL liuhosi Eskuadra Dom Aleixo no ekipa unidade intelejénsia, asegura iha segunda (14/8) tanba deskonfia envolve iha kazu konfrontu iha atividade graduasaun Organizasaun Arte Marsiál (GAM) Persauraan Setia Hati Terate(PSHT).
Konfrontu ne’e akontese iha segunda (14/8) tuku 4:00 madrugada, bainhira membru PSHT fila hosi serimónia graduasaun iha Tibar Munisípiu Liquiça.
Bainhira membru PSHT sira ne’e fila hosi Tibar, to’o iha área Tasi-Tolu derepente hetan provokasaun no tuda hosi ema individu balun atu mosu konfrontu ne’ebé alastra mai to’o iha área Rai-Kotu, Kampung Alor.
Hosi konfrontu rezulta uma no sasan komunidade balun nia hetan estragu no karrreta komunidade nian balun hetan estragu no karreta PNTL nian balun inklui membru PNTL balun hetan kanek bainhira tún hodi halo atuasaun iha terrenu.
Jornalista: Natalino Costa
Editór : Zezito Silva
