VIKEKE, 22 Abríl 2026 (TATOLI)—Ministériu Agrikultura, Peska, Pekuária no Floresta (MAPPF) destaka ona ekipamentu pezadu (eskavatór) ida iha irrigasaun Saeketu ba natar Laleiu, Suku Makadike de Cima, Postu Administrativu Uatulari, Munisípiu Vikeke, hodi halo normalizasaun rai ne’ebé taka irrigasaun.
Tuir agrikultór Suku Makadike de Cima, Agustinho Orlando, natar área Laleiu maioria seidauk halai tanba rai taka irrigasaun.
“Tan ne’e, ami husu ajuda ba MAPPF atu apoia ekipamentu eskavatór hodi normaliza irrigasaun ne’ebé daudaun ne’e rai taka,” Agustinho Orlando ba TATOLI iha natar Laleiu, Kuarta ne’e.
Nia husu MAPPF iha futuru presiza reabilita irrigasaun Saeketu tanba kanál irrigasaun husi mota Saeketu daudaun ne’e aat.
Iha fatin hanesan, responsavel ekipamentu pezadu iha Postu Uatulari, Munisípiu Vikeke, Vicente Rui Soares, hateten irrigasaun Saeketu ne’e rai henek no rai mak taka, entaun tempu agrikultór sira atu halo natar bee la bele tama ba natar laran, tanba ne’e sai dezafiu ba agrikultór sira iha natar Laleiu.
“Nune’e, ami koordena fali ita-nia ministériu mak mobilitaza ekipamentu pezadu mai iha irrigasaun Saeketu para halo normalizasaun. Se la halo normalizasaun ita-nia agrikultór sira labele halo sira-nia natar tanba tempu halo natar mak fulan ida-ne’e. Nune’e, daudaun ne’e ita-nia eskavatór halo hela servisu no apoia husi ita-nia agrikultór sira,” nia akresenta.
Nia relata, normalziasaun ba irrigasaun Saeketu husi husi natar Laleiu sei to’o iha mota Saeketu purvolta kilómetru haat-resin ne’ebé presiza hasa’e sedimentasaun sira hodi kanaliza bee ba natar.
Kona-ba reabilita irrigasaun Saeketu, Ministru Agrikultura, Peska, Pekuária no Floresta, Marcos da Cruz, haktuir atu halo reabilitasaun irrigasaun Saeketu MAPPF sei halo uluk estudu ba irrigasaun tanba normalmente presiza halo uluk estudu ba gastu reabilitasaun nian hafoin bele implementa.
Tuir dadus, natar Makadike ho totál ektare 450 ne’ebé benefísia populasaun lokaliza iha Suku Makadike de Baixo, Makadike de Cima no Makadike Uaitame ho totál komunidade 7.482 husi uma-kain 1.773.
Jornalista: Vitorino Lopes da Costa
Editór: Xisto Freitas da Piedade
