DILI, 15 Abríl 2026 (TATOLI)—Liuhusi reuniaun Konsellu Ministru, kuarta ne’e, Governu aprova Projetu Dekretu-Le,i ne’ebé aprezenta husi Ministru Negósius Estranjeirus no Kooperasaun, Bendito dos Santos Freitas, kona-ba alterasaun dahuluk ba Dekretu-Lei nú 48/2023, 23 Agostu, kona-ba Orgánika Ministériu Negósiu Estranjeiru no Kooperasaun (MNEC, sigla iha lian Portugés) nian.
Alterasaun ida-ne’e ho objetivu atu armoniza orgánika Ministériu nian ho alterasaun daruak ba kompozisaun Governu Konstitusionál IX nian, ne’ebé vigora ona, ne’ebé inklui kargu Vise-Ministra Negósiu Estranjeiru no Kooperasaun nian.
Vise-Ministru ba Asuntu Parlamentár, Aderito Hugo da Costa, hateten Ministériu Negósiu Estranjeiru no Kooperasaun mós ohin halo aprezentasaun ba alterasaun sira-nia lei orgániku instituisaun nian.
“Entaun iha aprezentasaun seluk tan ne’e kona-ba diversus sira. Aleinde ne’e, ohin mós sira halo avaliasaun ba servisu sira-ne’ebé la’o hela liuliu liga ho rejime presu mina nian no nafatin akompaña funu sira iha médiu oriente,” Vise-Ministru ne’e relata ba jornalista sira iha Palásiu Governu, ohin.
Aleinde diploma ne’e mós estabelese katak Sekretáriu-Jerál MNEC, ne’ebé responsavel hodi jere, koordena no superviziona apoiu tékniku-administrativu no finanseiru ba servisu hotu-hotu Ministériu nian, hetan nomeasaun hosi Ministru Negósiu Estranjeiru no Kooperasaun entre funsionáriu diplomátiku sira ho kategoria embaixadór ka nu’udar alternativa, konselleiru ho esperiénsia profisionál no diplomátika ne’ebé relevante iha servisu sentrál no perifériku esternu ministériu nian.
Jornalista : Alexandra da Costa
Editór : Cancio Ximenes
