MALIANA, 20 maiu 2023 (TATOLI) – Prezidente Komisaun Nasionál Eleisaun (CNE, sigla portugés), José Agustino Belo, agradese ba Ofisiál Supervizaun Eleitorál (OSE) hamutuk na’in-171 iha munisípiu Bobonaro ne’ebé serbisu durante fulan-haat hodi fó susesu ba eleisaun parlamentár 2023.
Maske kna’ar ne’ebé atribui ba OSE sira durante fulan-haat de’it, maibé konsege hatudu rezultadu di’ak iha eleisaun lejizlativa foin lalais ne’e tuir lema katak tranparánsia, imparsiál no neutralidade.
Notísia relevante: CNE Bobonaro husu ofisiál eleitorál 1.700 iha serbisu ho imparsiál
“Ita kontente tanba ita-boot sira 171, ne’e modalidade boot, imi-nia prátika, matéria oituan, maibé konsege utiliza imi-nia matenek, eleisaun bele la’o ho di’ak. Agredese ida ke boot tebes ba imi-nia serbisu, ho imi-nia kontribuisaun mak agora ita hili ona ita-nia membru governu no ita-nia membru deputadu sira,” nia hateten iha serimónia agradesimentu ho OSE, iha edifísiu CNE Bobonaro, segunda ne’e.
Maske OSE sira despede ona CNE, maibé nia enkoraja atu kontinua serbisu aprende no labele baruk nune’e bele dezenvolve idak-idak nia kapasidade.
“Ohin imi bele sai hosi fatin ida-ne’e, maibé siénsia no esperansa sei la lakon, ne’ebé kontinua prepara-aan ba, karik loron ida ita sei presiza malu,” nia fó hanoin.
Reprezentante OSE, Juanina da Costa, agardese bele hola parte iha instituisaun CNE durante fulan balun, tanba bele hetan esperiénsia kona-bá lala’ok eleitorál nian.
“Ami triste, atu buka tán iha-ne’ebé, maibé la signifika katak dalan laiha ona ba ita hotu, mai ho esperansa fila ho lembransa, ne’ebé ami aprende fulan-haat hodi bele ba buka fali servisu iha instituisaun sira seluk,” nia katak.
Biban ne’e CNE mós atribui serifikadu apresiasaun ba OSE 171 hosi postu administrativu neen, suku 50 hodi rekoñese sira-nia kontribuisaun.
Notísia relevante:Kandidatu ofisiál supervizaun CNE Bobonaro 211 pasa ba teste orál
Jornalista : Sérgio da Cruz
Editór : Evaristo Soares Martins
