DILI, 08 Jullu 2025 (TATOLI)—Pesoál Saúde husi Servisu Saúde Munisípiu Dili no Servisu Nasionál Ambulánsia Emerjénsia Medikamentu no Krús Vermella Timor-Leste (CVTL) hamutuk 72 partisipa formasaun kona-ba atendementu ba atleta jogu desportivu CPLP ne’ebé sei realiza iha 17-27 Jullu 2025 iha Timor-Leste.
Notísia Relevante: Abertura jogu desportivu CPLP sei hala’o iha 19 Jullu
Diretór Servisu Nasionál Ambulánsia no Emerjénsia Médika, Institutu Públiku (SNAEM, I.P), Simplicio Amaral, informa husi ekipa saúde nasionál Ministru Saúde nian fó ona refreshing training ba parte primeiru sokoru nian, hodi atende atleta sira-ne’ebé mak hetan problema saúde ruma iha terrenu durante jogu desportivu ne’e la’o.
“Husi formasaun ne’e mai husi ita-nia profisionál saúde husi sentru saúde munisípiu Dili, fasilitadór sira-ne’e, ita haruka ona ba Diretór Ezekutivu Hospital Nasionál Guido Valadares, entaun haruka ona ita-nia doutór espesialista medisina desportu nian. Iha ne’e, hodi fahe informasaun oinsá atu bele atende atleta sira durante jogu akontese,” Simplicio Amaral dehan ba jornalista sira, iha edifisiu SNAEM, I.P, Kaikoli, ohin.
Nia relata, Servisu Nasionál Ambulánsia Emerjénsia no Medikamentu, hamutuk ho Médiku sira, tanba sira atu asegura atelta jogu desportivu CPLP nian.
“Iha ne’e, parte servisu Ambulánsia no Emerjénsia Médiku, doutór no enfermeiru-enfermeira sira, tanba sira la’ós asegura de’it ba atleta sira maibé asegura mós ba abertura ba espetadór sira. Husi parte SNAEM prepara mós parteira no médiku husi parte CVTL sira mós iha pesoál saúde hanesan infermeiru no mediku sira,” nia informa.
Nia haktuir, ekipamentu médiku sira, daudaun ne’e preparadu ona, nune’e sei atende ba jogu desportivu CPLP ida-ne’e.
“Hela semana ida la’ós katak ita-nia ekipamentus zero maibé ita-nia ekipamentu iha ne’ebé, ami hetan iha servisu emerjensia ba atendimentu baziku nian, tanba ne’e keta laran metin ba sira. Ita sei estabelese postu ualu (8) mak ita identifika ona inklui mós ita tau matan ba ita-nia bainaka sira-ne’ebé hela iha otel,” nia dehan.
Iha fatin hanesan, Médiku Desportivu iha HNGV, Cornelio Coli, informa formasaun ida-ne’e atu prepara téknika sira liuliu ba téknika Profisionál Saúde sira, importante liuliu mak ligasaun jogu desportivu CPLP.
Tanba ne’e, formasaun importante tebes atu atende atleta sira iha durante jogu ramata, pesoál saúde sira-nia atendementu iha kampu jogu la hanesan ho parte asistente médiku hanesan iha Ospitál, Klínika ka postu saúde sira.
“Formasaun ida-ne’e, oinsá mak atleta sira alegasaun iha ain ka liman, téknika primeira saida mak ita uza, nune’e ohin ita bele fó ona esperiénsia balun kona-ba ekipa atleta sira, ligasaun ho desportivu nian. Ohin, atu fó ba ita-nia téknika profisionál saúde sira. Ha’u hanoin kona-ba kapasidade profisionál saúde sira-ne’ebé mak agora atu koloka, sira-nia esperiénsia bázika iha tiha ona. Ohin, fó koñesementu ruma ne’ebé mak update bazeia ba referénsia hanesan jogu desportiva internasionál balun ne’ebé mak dalaruma sira iha baze la hetan,” Cornelio Coli hateten.
Nia hatutan, pesoál saúde sira-ne’ebé mak iha ona esperiénsia bazika, bainhira formasaun desportivu kona-ba ligasaun ruma, ohin, téknika sira atu kompleta sira-nia esperiénsia bazika, dalaruma iha parte balun klínika saúde sira atende pasiente baibain bazeia ba sira-nia moras patolojia.
“Sira atende liu ba ligasaun desportivu, entaun sira iha ona esperiénsia bazika kona-ba oinsá atu kura kanek, oinsá atu estabiliza no mobiliza tohar ruma maibé ita tenke tama ho métodu desportiva internasionál uza. Nune’e, bele tuir padraun medisina desportiva nian,” nia relata.
Kordenadór CVTL Filiál Dili, Recardo Afonso, informa formasaun ida-ne’e hanesan fahe esperiénsia ida ba ekipa sira, atu oinsá mak hasa’e sira-nia koñesementu hodi halo atendementu ba jogu CPLP iha Timor-Leste.
“Ida-ne’e esperiénsia sira-ne’ebé mak ha’u atu bele fó asisténsia ba jogu CPLP nian. Maibé kona-ba formasaun ida-ne’e, ha’u hanoin pertinente tebes, ka’ós mai ha’u de’it maib’e ba mós voluntáriu sira no mós ba ekipa CVTL Filiál Dili, Pelumenus, atu bele hasa’e no aumenta tan abilidade sira-ne’ebé mak iha, atu bele profunda no mellora liután esperiénsia sira-ne’ebé mak atu hasoru eventu internasionál hanesan Jogu desportivu CPLP ne’e,” Recardo Afonso afirma.
Entretantu totál orsamentu ne’ebé mak Ministériu Finansa aloka ba jogu desportivu CPLP ne’e hamutuk rihun $30.
Jornalista : Felicidade Ximenes
Editór : Cancio Ximenes
