DILI, 10 Juñu 2026 (TATOLI)—Diretór Servisu Kompra iha Institutu Nasionál Farmásia Produtu no Médikamentu (INFPM), Sergio da Costa Belo, informa INFPM sei sosa ekipamentu reajente ho orsamentu hamutuk millaun $3-resin ne’ebé foti husi Orsamentu Retifikativu 2026 ba INFPM hamutuk millaun $8,7.
“Orsamentu Ratifikativu tinan 2026 ba INFPM ne’e barak liu ita atu kompra reajente no restu ne’e ba iha ai-moruk no kosumaveis sira inklui selu taxa sira,” Sergio da Costa Belo hateten ba jornalista sira iha INFPM, Kampung Alor, ohin
Nia relata, orsamentu ne’e bele dehan sufisiente tanba ninia natureza emerjénsia atu responde ba nesesidade medikamentu nian, tanba haree ba funu iha mediu oriente kle’ur bele uza osan ne’e hodi kompra neseidade ai-moruk ne’ebé mak Timor Leste presiza.
Antes ne’e, Diretór Nasionál Farmásia Produtu Médiku (DNFPM), Delfim Ferreira, hateten INFPM sei kompra ai-moruk ho emerjénsia ho Orsamentu Retifikativu ne’ebé Governu aprova no sei kompra fila-fali ba ai-moruk sira-ne’ebé mak presiza liu, entaun orsamentu ne’ebé atu sosa ne’e totál hamutuk millaun $8,7.
“Entaun, ami prepara fila-fali lista kuantifikasaun ida adisional hodi ajusta kompra ba orsamentu ne’e iha fulan ida ka rua nia laran,” nia dehan.
Jornalista : Felicidade Ximenes
Editór : Cancio Ximenes
