DILI, 21 novembru 2023 (TATOLI) – Sekretáriu Estadu Peskas, Domingos da Conceição dos Santos ‘’Mau-Caro’’ akompaña hosi Sekretáriu Estadu Florestas (SEF) Flornandino Vieira da Costa selebra loron mundiál peskas ho kuda ai-parapa.
Selebrasaun ne’e hala’o iha Suku Hera, Postu Administrativu Metinaro, Munisípiu Dili ho tema “Peskadór ida kuda Ai-parapa ida”.
Atividade ne’e, hetan antuziasmu tebes hosi peskadór no estudante sira hodi kuda ai-parapa oan ne’ebé prepara hosi Asosiasaun KIWA ho Blue Ventures kuaze rihun 30.
“Timor-Leste iha ai-para etare rihun sia maibé hetan estragu lubuk ona, ne’e la’os kontribuisaun hosi ema de’it, maibé mós hosi natureza, tanba sedimentasaun ne’e mós bele prezudika. Ida-ne’e la hatete ita atu dun kulpa ba malu, ne’e hanesan dezafiu ne’ebé ita enfrenta, ba oin oinsá ita bele halo buat ruma”, SEP Mau-Caro liuhosi komunikadu ne’ebé Agência TATOLI asesu hosi media SEP, ohin.
Nia dehan, dalabalu ema dúvida, kuda ai-parapa barak atu halo saida.
“Ai-parapa nia funsaun barak tanba kuda barak iha tasi ibun ne’e bele hodi jere tasi ho di’ak, eko sistema sira bele moris iha ne’ebá, hanesan ikan, kadiuk no seluk tan, ne’e signifika bele fó rendimentu boot ba peskadór sira”, nia revela.
Tuir nia haree, ema fasil atu tesi no estraga ai-parapa maibé susar atu kuda ai-parapa tanba lori tempu naruk mak ai ne’e bele boot no buras.
“Ha’u dezafia peskadór sira atu kuda barak liután ai-parapa iha area Hera nian, tinan lima ka 10 mai ita boot sira mak sei sai éroi ba fatin ne’e”, nia friza.
Iha okaziaun ne’e, SEF hateten ai-parapa etare rihun sia iha territóriu Timor laran, agora hela de’it etare rihun lima signifika etare rihun haat mak ema estragu ba sira-nia nesesidade.
Tanba ne’e, planu ba IX Governu Konstitusionál nian atu konserva hikas ai-parapa iha territóriu Timor laran.
“Eko sistema mangrove iha Hera totál etare 52, iha etare 15 mak hetan estragu, hosi ema no natureza dezde portugés nia tempu to’o agora, tanba ne’e selebrasaun loron mundiál peska ho tema peskadór ida kuda ai-parapa ida, ho objetivu atu konserva hikas ai-parapa iha área ida-ne’e”, Sekretariu Estadu Floresta konklui.
Jornalista: Hortencio Sanchez
Editór : Zezito Silva
