DILI, 24 Fevereiru 2026 (TATOLI)—Sentru Saúde Munisípiu Dili (SSMD), halo enkontru ho parseiru sira hanesan Hamnsa, Menzies, Fundasaun Alola, Kruz Vermelha Timor-Leste (CVTL), atu apoiu ekipamentu atu kombate dengue, tanba iha Munisípiu Dili ne’e kazu dengue sa’e maka’as.
Diretor Servisu Saúde Munisipiu Dili, Mateus Pinto, dehan razaun konvida parseiru sira mai halo enkontru, tanba haree ba kazu dengue ne’ebé fulan rua de’it rejista maka’as maibé laiha fasilidade ne’ebé minimu hodi kombate kazu dengue ne’e rasik.
“Ohin, enkontru ho parseiru sira, tanba ita haree ba kazu dengue sa’e maka’as, maibé ita menus iha transporte no hena falun abate, ho nunee ita konvida sira mai atu husu sira-nia apoiu. Entaun, iha enkontru ida ohin, iha rezultadu ne’ebé di’ak tanba parseiru balun apoiu karreta no balun mos apoiu hena,” Mateus Pinto hateten ba jornalista sira iha Formosa, ohin.
Diretór ne’e relata, daudaun ne’e Servisu Saúde Munisípiu Dili rejista ona kazu dengue husi Janeru to’o mai 23 Fevereiru ne’e hamutuk ona 1.796 no husi númeru ne’e iha na’in-11 mak mate.
“Ha’u hanoin sentru saúde ne’e mak ita rejista kazu dengue maka’as liu mak Sentru Saúde Komoro, Vera Kruz, Bekora, Formosa no Metiaro. Daudaun ne’e mós sentru saúde Formosa no Komoro la fó baixa ona pasiente dengue, maibé hela mak Vera Kruz tanba agora ita prepra ona fatin iha Kuarentena Tasi-Tolu,” nia dehan.
Nia mós haktuir, pasiente ne’ebé daudaun halo hela tratamentu kuarentena Tasi-Tolu hamutuk 35-resin no restu halo tratamentu iha Hospitál Nasional Guido Valadares (HNGV) no Vera Kruz.
Nia hatutan, atu halo prevensaun ba kazu dengue mak fomigasaun ba fatin sira-ne’ebé risku ba dengue.
“Ezemplu, hanesan iha Dom Aleixo, ita halo fumigasaun ba área risku sira iha 20 Novemrbu, Fatuhada, Bairru Pite, Manleuana, Hera, Bekora no seluk tan ne’ebé mak labarik sira dengue sa’e maka’as,” nia dehan.
Nia hateten, halo ona fumigasaun ba uma kain hamutuk besik 6.000 no fahe ona abate ba metade komunidade iha munisípiu Dili.
Iha fatin hanesan, Project Preformance Maneger HAMNASA, Laurensius Amir Lein, hateten parseiru sira sei apoiu karreta ida ba Servisu Saúde Munisípiu Dili, atu nune’e bele halo fumigasaun ba Dili laran.
“Agora daudaun, ita iha situasaun ne’ebé mak todan loos, tanba iha fulan rua de’it ita iha ona kazu dengue hamutuk 1.796 no mate hamutuk 11. Entaun, SSMD husu ba apoiu parseiru sira oinsá atu apoiu, ho nune’e HAMNASA fó karreta ida hodi uza ba fomigasaun iha área risku sira iha Dili,” nia dehan.
Jornalista : Felicidade Ximenes
Editór : Cancio Ximenes
