AINARU, 11 Juñu 2026 (TATOLI)-Ekipa husi Prezidensia Repúblika, lidera husi Asesór Sosiedade Sivíl no Asuntu Sosiál, Quintiliano Moniz Carvalho, iha kuarta ne’e, fó apoiu umanitária ba família vulneravél ida iha suku Soro, postu administrativu Ainaru, Munisípiu Ainaru no planu sei harii uma permanente ba família ne’e iha futuru.
Ekipa husi Prezidensia Repúblika, fó ona apoiu hanesan sasán nesesidade bázika no osan ba idoza Cristina do Rosário ho nia-oan feto Manuela do Rosário ne’ebé moris ho kondisaun defisiénsia fízika,
Asesór Sosiedade Sivíl no Asuntu Sosiál, Quintiliano Moniz Carvalho, informa katak intervensaun hosi Xefe Estadu ne’e akontese bainhira asesu informasaun ne’ebé maka publika iha média lokál Orluli Ainaru hodi deskreve kona-ba kondisaun real família ne’e nian.
Tuir nia apoiu umanitária ne’ebé ekipa distribui maka foos, mina no aihan seluktan. Enkuantu kona-bá hari’i uma ne’e, ekipa husi Prezidénsia Repúlika sei koordena ho autoridade munisipál hodi hetan solusaun urjénsia antes hari’i uma ba família kbi’it la’ek ne’e.
“Ita presiza koordena ho autoridade lokál atu haree estatutu ba rai ne’ebé Avo Cristina ho nia-oan hela ba, atu nune’e labele mosu fali reklamasaun hosi ema seluk ka Estadu iha futuru,” Asesór ne’e hateten ba Jornalista sira iha Suku Soro, Ainaru.
Asesór Sosiedade Sivíl no Asuntu Sosiál husi Prezidénsia Repúblika, mós deskobre katak, Manuela do Rosário to’o agora seidauk simu subdísiu invalidéz nian tanba ne’e maka sei buka hatene tanba sa no rajaun saida ne’ebé impede sidadaun ne’e seidauk simu ninia diretu.
Nia lamenta no konsidera autoridade komutaria sira la tau importansia ba família ne’e hodi fó informasaun ba Estadu no governu hodi nune’e bele hetan apoiu.
“Dukur liu” no lakoi rona povu nia lian, tanba loloos inforamsaun kona-bá povu kbi’it-la’ek tenke mai hosi autoridade lokál sira, la’ós hein de’it média mak fó sai,” nia lamenta.
Iha fatin hanesan, Idozu Cristina do Rosário husu ba Prezidente Repúblika, hodi konstrui uma ida ba nia ho oan feto atu hela no mós husu atu fasilita tratamentu saúde ba idozu no invalidéz ne’e iha futuru.
“Udan mai bee sempre tama no ami kbi’it laiha atu halo uma di’ak ida, tanba ne’e nafatin husu ba Avo Ramos bele apoiu uma ida ba ami-rua,” nia hato’o ho mataben.
“Obrigado ba Prezidente Repúblika ne’ebé fó ona apoiu umanitária sasán no aihán,”
Jornalista: Francisco Sony
Editór: Florencio Ximenes
