DÍLI (TATOLI)—-Governu Timor-Leste (TL) liuhusi desizaun Konsellu Ministru (KM), Tersa (23/03/2017) aprova Timor-Leste nia kandidatura hodi sai Membru Rejionál potensiál ba Banku Aziátiku de Investimentu iha Infraestruturas (AIIB-Asian Infrastructure Investment Bank).
Tuir komunikadu imprensa ne’ebé TATOLI asesu, ohin, Tersa (23/03/2017) katak Timor-Leste asosia ba instituisaun ida ne’e hamutuk ho nasaun membru 69 seluk.
“Buka hadi’a dezenvolvimentu ekonómiku no sosiál iha Ázia ba projetu infrastrutura ne’ebé ho kualidade aas, finanseiramente viaveis no belun ho ambiente,” haktuir komunikadu ne’e.
Governu autoriza Ministériu Finansa hodi hahú proseu adezaun iha 2016. Iha Janeiru 2017, Konsellu Ministru analiza ho kuidadu termu no kondisaun sira ba adezaun ne’e.
Timor-Leste sei transita nu’udar “membru potensiál” no junta ho ofisiál ba BAII hodi nune’e prosedimentu internu nesesáriu bele kompletu no prestasaun kapitál dahuluk rai iha Banku.
Membru nasaun ASEAN sira, dadaun ne’e sai membru ba banku ne’e no iha hela prosesu adezaun no sauda orientasaun BAII nian ba Ázia no hatuur finansiamentu ba iha infrastrutura ne’ebé kualidade.
Portavoz VI governu, Ministro Agio Pereira, refere katak “governu iha razaun di’ak hodi kongratula ho aprovasaun ba kandidatura ita nian ba BAII, tanba asosiasaun ba banku ida ne’e sei fó kbiit ba ita-nia integrasaun hamutuk ho nasaun Sudeste Aziátiku sira”.
Le’e hotu: Hetan Lampu Verde Hosi AIIB, Governu Deskuti Adeasaun TL http://www.tatoli.tl/2017/03/1981/
Jornalista: Rafy Belo / Editor: Gantry Meilana
