DILI, (TATOLI) – Primeiru-Ministru, Rui Maria de Araújo dehan importante hosi parseria mak rezultadu servisu, tanba ne’e governu halo parseria ho sosiedade sívil atu hamosu ámbitu koñesimentu polítika, sosiál, ekonómiku, kulturál ne’ebé konstituisaun rekoñese sidadaun hotu.
“Kontestu ne’e, governu mós rekoñese, mesak sei labele halo esforsu tomak atu bele garante katak sidadaun sira konsege duni heta direitu sira ne’e”, Xefe Governu hatete iha ámbitu asina kontratu ho Organizasaun Naun Govermentais ba projetu ne’ebé hetan ajuda husi governu liuhosi fundus sosiedade sívil ne’ebé hala’o iha Palásiu Governu, foin lalais ne’e.
Tuir PM, prinsípiu konsetu importante hosi parseria mak direitu no obrigasaun ho rezultadu servisu. Intervensaun ne’ebé governu halo hamutuk ho sosiedade sívil durante besik tinan 10 ona ne’e nia rezultadu oinsá.
“Ezemplu bainhira ONG interven iha área ida, ita bele haree rezultadu adekuadu, hanesan bee moos, maibé kuandu ONG para buat hotu sai paradu”, kompara.
Ne’e duni, tuir PM presiza esforsu hosi sosiedade atu haree oinsá bele ultrapassa situasaun ne’e.
Katak tan, situasaun ne’e, espíritu voluntarizmu seirauk buras, bainhira observa didiak, tradisaun no kultura elementu voluntariu boot tebes.
Nune’e mos, Diretór FONGTIL, Arsenio Pereira dehan tinan-tinan sempre halo parseria ho governu hodi dezenvolve rai ne’e. Mesmu ONG forum barak tebes maibé tuir relatóriu 47 de’it mak passa aprovasaun husi proposta sira mak aplika.
“Hein katak númeru ida oituan, bele implementa ho di’ak”, katak tan.
Koordenadór Sosiedade Sívil, Joaquim Freitas informa totál projetu ne’ebé hetan husi fundu sosiedade sívl hamutuk 611, aumenta tan tinan ida ne’e 50 resin. Portantu besik projetu 700.
Projetu balun hetan dala rua no tolu, ida ne’e seidauk konta ho projetu hosi Diozese Dili, Baucau no maliana. Kada tinan, kuaze implementa projetu liu 200.
Totál orsamentu desde tinan 10 nia laran, meza sosiedade sívil asina akordu hamutuk US$ 93,772,224. Rezultadu mak iha formasaun ladun sente maibé Igreja iha Dili laran kuaze harii hotu ona, iha área rurál mós Igreja barak mak konstrui ona mas ema barak protesta nusa mak la tau atensaun iha área edukasaun no saúde.
Jornalista: Julia Chatarina
Editora: Rita Almeida
