DÍLI (TATOLI) – Dalan barak ba Roma, haktuir livru sagrada eskritura. Nune´e, atu halo Timor-Leste (TL) sai koñesidu, iha dalan barak Timoroan bele halo ho maneira pozitiva hodi promove nasaun ne´ebé foin restaura nia indepedénsia iha tinan 2002 ne´e ba komunidade internasionál.
Helena Verdial Ramiro de Jesus Guterres, joven Timoroan ida ho otas sei nurak, idade 14 promove ona TL liuhusi nia talentu ne´ebé iha, iha rai badiin, tasi sorin, Coimbra- Portugal.
Ba Ajénsia TATOLI husi Coimbra, ohin, Segunda (03/04/2017), fuan domin husi Domingos Verdial Guterres no Sandra Ramiro de Jesus haktuir, bainhira ho otas sei tinan walu, empreza moda oioin iha nasaun ho lian portugés ne´e hahú ona bolu nia hodi ba tuir “casting” fotografia no dezfila moda nian.
Iha 2009 no 2010, feto Timoroan ne´ebé moris iha Coimbra, 3 Juñu 2002 ne´e, tuir mós iha eventu FASHION WEEK tanba ho intensaun ida katak hakarak hakle´an liutan nia talentu ne´ebé iha no hatudu ba mundu karakter orijinál timoroan nian liuhusi moda iha ema rain.
Hahú husi ne´e kedas, tuir mai, feto ho zodiaku ka fitun Gemini ne´ebé dadaun ne´e hala´o nia estudu iha eskola Dra. Maria Alice Gouveia, 8º ano, hetan fiar hodi tuir dezfila moda nian ho atór, atora no aprezentadór famozu sira Portugal nian hanesan Andréia Diniz, Paulo Pires, Pedro Guedes, Afonso Vilela no Liliana Campos ne´ebé organiza husi Agência Moda portugeza nian ida, Agência Bliss ka Bliss Agency.
Ho esperiénsia ne´ebé fetoran ho altura 1,64 metru, fuuk metan, oin kabuar isin morena ho tamãnu ropa XS no kalsadu tamañu 36 ne´e iha, tuir mai tan, iha 2015, nia hetan tan oportunidade hodi partisipa iha eventu moda nian no tuir “casting” fotografia ne´ebé organiza husi Ajénsia MAKE ME STAR, Portugal nian. Nune´e, ho modelu ne´ebé nia aprezenta iha dezfila moda ne´e, habiban nia sorte ida katak hetan kontratu husi ajénsia ne´e.
Foin dadaun ne´e, iha loron hirak liu ba, dala ida tan ho karakter naturál timoroan ne´ebé nia iha, halo jestór eh produtór ajénsia moda portugeza ne´e matan kona no laran monu hodi hili feto timoroan ne´e hodi hatudu nia talentu, ho nia karakter moda timorense iha eventu dezfila moda nian, iha rai Don Pedro no Dona Inês ne´e, iha Centro Comercial Gira Solum.
Iha dezfila ne´e, iis rohan husi Domingos Verdial Guterres no Sandra Ramiro de Jesus ne´e informa katak ekipa Juri MAKE ME STAR avalia katak nia iha “Look” internasionál tanba kór isin lolon ne´ebé mak nia iha, karaktér no espiritu timoroan ne´ebé sai nia murak.
Ho avaliasaun ida ne´e, sorte dala ida tan haliis ba feto timoroan ne´ebé sempre ho oin midar ne´e. Katak hetan tan kontratu hodi sai moda no fotografia ba Agência MAKE ME STAR husi sidade Porto, Portugal. Tanba ne´e, feto isin morena ne´e informa katak nia sei halo tan dezfila iha sidade Porto hamutuk ho estilista portugés sira, iha prinsípiu Juñu 2017.
Entretantu, fofoun atu tuir dezfila moda nian iha Coimbra, bainhira otas sei ki´ik, nu´udar labarik ida, nia haktuir katak sente ta´uk tanba foin ho de´it idade tinan walu maibé halo dezfila moda nian iha barak nia oin, ema barak mak asiste. Maske nune´e, nia hakbiit aan no konsege halo dezfila ne´e to´o remata.
Tanba ne´e, husi ne´e kedas, nia sente kontente no koko aprende nafatin hodi realiza nia mehi katak sai mós estilista timoroan ida alende realiza nia mehi kona-ba nia estudu.
Helena Ramiro Guteres nia inspirasaun hodi sai estilista mak top estilista amerikana,Gigi Hadid (Jelena Noura) no aprezentadora televizaun no estilista amerikana, Kendall Janner. Fraze moda nian ne´ebé nia gosta liu hodi promove nia talentu, iha portugés nia hateten: “Gosto de novos desafios e de fazer coisas diferentes. Isso para mim é o que importa. Estar na moda é: estar apaixonada por si mesma”. Katak, nia gosta dezafiu foun sira no halo buat ne´ebé la hanesan. Ida ne´e ba nia, buat ne´ebé mak importa. Ho moda: laran sempre monu.
Ho talentu ne´ebé nia iha, ho oportunidade ne´ebé nia hetan nu´udar timoroan iha rai li´ur, Helena Ramiro hateten katak sente orgullu nu´udar timoroan. “Ha´u sente orgullu nu´udar timoroan. Nu´udar timoroan bele hamutuk ho ema modelu portugez nian iha ájensia modelu nian,” nia haktuir.
Tanba ne´e, maske ho otas ne´ebé sei nurak, nu´udar timoroan nia espera ba foinsa´e timoroan, feto eh mane katak nu´udar foinsa´e, ita labele subar talentu ne´ebé ita iha, hodi hatudu ba mundu katak Timor-Leste mós iha foinsa´e sira ne´ebé iha talentu oioin hanesan múzika, desportu, moda no seluk tan.
Informasaun kona-ba estilista joven timoroan ne´e bele asesu mós iha link ne´e: https://web.facebook.com/HelenaRamiroJesus/?fref=ts
Jornalista: Rafy Belo
Editor: Gantry Meilana
