LOSPALOS, (TATOLI) – Bee nu’udar nesesidade báziku ba ema maibé realidade hatudu katak komunidade Iralafai hakilar nafatin bee moos.
“Ami komunidade preokupa tanba durante fulan haat ona, nain ulun sira la fó atensaun ba nesesidade bee moos ne’ebé urjentemente iha ita nia moris”, dehan Bento da Silva ba Tatoli iha Iralafai foin lalais.
Hosi fulan hirak ne’e, komunidade Iralafai esforsu hodi buka bee iha fatuk laran ho uza lampada, lilin no lalin jerigen ho bote atu bele tama hodi hetan bee moos e la’o kuaze kilometru ida hosi aldeia ba bee matan, kuandu konsumidór sira tama ba fatuk kuak tenke la’o ho metru 70 hafoin to’o ba bee fatin.
Habitante Iralafai, Bento da Silva husu ba ukun nain sira atende nesesidade bee moos. “Bomba a’at ona durante fulan haat, autoridade lokál sira halo ona esforsu maibé ami hein rezultadu fornesimentu bee moos”, haktuir.
Xefe Kontrolu Bee, Agusto da Silva konsidera komunidade sira la-asesu bee moos tanba bomba avaria maibé iha ona koordenasaun ho autoridade munisipál no nasionál atu hadi’a.
Entretantu, Xefe Aldeia Iralafai, Alberto dos Santos informa, autoridade nasionál sira mai halo ona observasaun, konforme informasaun katak, tempu badak ekipa diresaun nasionál sei mai hadi’a.
Komunidade aldeia Iralafai, suku Bauro, postu administrativu Lospalos, munisípiu Lautem preokupa tanba bomba avaria durante fulan haat, hahú janeiru to’o abríl 2017.
Antes ne’e, loron 14 fulan-abril 2002, Xanana Gusmão kuandu eleitu nu’udar Prezidente dahuluk iha Repúblika Demokrátika Timor-Leste no hetan toma posse iha 20 Maiu, halo vízita no hasoru malu ho komunidade ho matan been tanba tenke kuru bee iha kuak laran.
Vízita ne’e, hetan atendimentu urjente ho makina bomba hodi kanaliza bee moos ba komunidade aldeia refere.
Jornalista: Zezito Silva
Editora: Rita Almeida
