BAUCAU, (TATOLI) – Padre João Jerónimo iha nia omília ba misa domingu resureisaun, (16/4) haklalen katak Jesus nia moris hias hodi manan mate nia ukun nu’udar konkista ida hodi halo salvasaun ba umanidade, tanba ne’e nu’udar sarani tenke sai sasin hanesan apostolu sira halo ona.
“Jesus nia moris hias halo ita la monu ba manobra diabu nian. Diabu nunka hatene Maromak nia planu. Tanba ne’e, bainhira ita fiar iha Jesus Kristu, ita sei moris hias hamutuk ho Nia”, esplika ba sarani sira iha Kapela São Francisco de Assis, Caisido, suku Tirilolo, munisípiu Baucau.
Jesus Kristu nia mate no moris hias ne’ebé sasin husi apostolu sira nu’udar sasin ne’ebé haklaken ba mundu tomak kona-ba fiar sarani nian. “Jesus nia mate no moris hias halo mundu fiar katak Maromak nia kbiit liubuat hotu”, haklaken.
Tuir amu bainhira tuir Maromak nia planu, diabu sei la ukun ita no sei la monu nomós aseita ho diabu nia tentasaun atu monu ba sala no sai sala nia atan.
“Ita fiar Maromak, fiar ba Jesus nia moris hias ita moris hias hamutuk hikas ho nia hodi hetan moris foun”, konklui.
Jornalista: Rafy Belo
Editora: Rita Almeida
