DILI, (TATOLI) – Komisaun Funsaun Públika (KFP) implementa konkursu uza sistema eletrónika atu bele asegura prinsípiu tau ema loloos tuir ida-idak nian kualidade hodi tau ba fatin loloos “The Right Man On The Right Place” signifika, ema ne’ebé dedika-án ho kapasidade no kompeténsia atu buka vaga.
Prezidente KFP, Faustino Cardoso Gomes ba Tatoli iha Ospitál Nasionál Guido Valadares kuarta (19/4) hafoin dizemina informasaun ba profisionál saúde kona-ba kompeténsia nu’udar funsionariu públiku.
“KFP dezenvolve konkursu eletrónika atu bele asegura prinsípiu meritokrasia (meritu ou kapasidade), signifika ema ne’ebé mak dedika-án ho nia kapasidade, kompeténsia ne’ebé koresponde karatéristika hosi vaga ne’ebé mak konkore”, esplika.
Konkursu eletrónika implementa ona hosi KFP, Provedoria Direitu Umanu (PDHJ) no ministériu seluk sei iha prosesu hanesan, Ministériu Justisa (MJ), Diresaun Nasionál Terras propriedade (DNTT), Prezidénsia Konsellu Ministru (PCM), Prezidénsia Repúblika.
Sistema eletrónika ne’e, hanesan modalidade ida atu funsaun públika hodi hadook potensialidade preokupasaun sira kona-ba Korupsaun, Kolusaun no Nepotizmu (KKN).
“Atu atinje objetivu di’ak, ema tenke kompetente duni atu konkore área ne’ebé mak aplika ba, atu responde ne’e, Komisaun Funsaun Públika iha komputadór 10, kuandu ministériu sira hakarak uza fasilidade, ami formalmente husu sira hodi lori komputadór rasik ba tau hafoin husu sira atu dezenvolve pergunta tuir karakteristika vaga”, haktuir.
Ko’alia kona-ba ministériu sira atu dezenvolve, Faustino Cardoso hateten ministériu ida-idak dezenvolve hafoin hato’o mai iha KFP hodi tau pergunta sira iha sistema.
Jornalista: Zezito Silva
Editora: Rita Almeida
