DILI, (TATOLI) – Diretór Ezekutivu Forum Organizasaun Naun Govermentál Timor-Leste (FONGTIL), Arsenio Pereira preokupa governasaun foun ne’ebé mak sei mai tanba Prezidente Repúblika, Taur Matan Ruak seidauk dekreta loron eleisaun lejislativa ne’ebé governu propoin atu akontese iha loron 8 fulan-jullu tinan ne’e.
“Governu hato’o proposta atu Prezidente Republika, Taur Matan Ruak dekreta kalendáriu eleisaun lejislativa, horseik nu’udar loron ikus maibé seidauk, implika ba governu foun 2018”, Diretór FONGTIL ba Tatoli iha Kaikoli, kinta (20/4).
Impaktu seluk mak formasaun governu foun, parlamentár no planu orsamentu retifikativu nomos verba Estadu 2018.
Mandatu governu atuál sei remata iha agustu, automatikamente estrutura ukun foun simu kna’ar. Kuandu ida ne’e mak la-akontese relasiona ho data eleisaun, órgaun exekutivu seidauk bele servi Estadu.
“Kuandu loron eleisaun dekreta ona iha agustu signifika kampaña lejislativa sei iha setembru no eleisaun sei akontese iha outubru no dalaruma forma governasaun foun sei monu iha novembru”, katak.
Enkuantu, lei orsamentu Estadu hateten, verba ba tinan oin tenke tama ona ba parlamentu nasionál iha loron 15 outubru.
Jornalista: Zezito Silva
Editora: Rita Almeida
