DILI, (TATOLI) – Planu asaun anuál 2017 ne’ebé Parlamentu Nasionál aprova, TradeInvest Timor-Leste sei hala’o forum negósiu iha nasaun haat hanesan Indonézia, Singapura, Brazíl no Austrália. Darwin nu’udar forum dahuluk ne’ebé sei akontese iha loron 16 fulan-juñu.
Razaun fundamentál realiza business forum ne’e tanba Timor-Leste labele hein de’it investidór sira atu mai maibé bele tuir sira no promove potensialidade Nasaun nian.
“Tuir emprezáriu no investidór sira iha Austrália, forum iha Darwin sei husu disponibilidade Primeiru-Ministru atu loke fórum, se laiha tempu bele delega kompeténsia ba Ministru Koordenadór Asuntu Ekonómiku atu loke ofisialmente”, informa Diretór Ezekutivu TradeInvest, Arcanjo da Silva, iha Liceu, ohin.
Aleinde ne’e konvida mós emprezáriu timoroan sira, operadór otelaria, kompañia sira ne’ebé investe iha setór agrikultura atu aprezenta potensialidade iha Timór no konvida investidór Austrália no rai seluk ne’ebé partisipa atubele hamutuk ho investidór nasionál hodi investe iha Timór.
Forum ne’e konsentra no diskute setór tolu hanesan agrikultura no peska, turizmu no minarai no gás.
Haree ba mandatu Governu Konstitusionál da-neen nian atu remata, forum dahuluk ne’e hala’o tanba parte TradeInvest servisu hamutuk ho Governu Norte Territóriu Austrália.
“TradeInvest sei mobiliza nia ema, setór, privadu, kámara komérsiu, ho emprezáriu sira ne’ebé susesu ona iha Timór atu bá fó sasin katak Timór ne’e nasaun ida potensiál tebes ba investimentu, estavel atu simu investimentu, ambiente negósiu ne’ebé ohin loron konduzivu tebes ba investidór atu mai”, katak.
Forum ne’e sei la’o durante loron ida maibé sei hala’o mós kalan kultura ne’ebé organiza husi Ministériu Turizmu Arte no Kultura.
Ekipa sei arranka ba Darwin iha segunda semana oin atu hasoru Governu Norte Territóriu oinsá organiza fatin no konvida investidór potensiál sira husi Austrália.
Orsamentu ne’ebé sei uza ba fórum ne’e pur-volta U$50 mil.
Jornalista: Maria Auxiliadora
Editora: Rita Almeida
