DILI, (TATOLI) – Associação Nacional de Música de Timor (ALMAMOR) sei hala’o kongresu ba datoluk iha 4 to’o 6 fulan-maiu 2017.
Liuhusi konferénsia ba imprensa ne’ebé hala’o iha Hotel Vila Verde Dili, sábadu (22/4), Prezidenti Komisaun Orientadór Terseiru Kongresu ALMAMOR, Erick Waiwatu esplika katak objetivu hosi kongresu ne’e atu lori hamutuk artista múziku sira hotu hodi bele debate kona-ba Estatutu no Forma Estrutura Difinitivu no mós apresentasaun establesementu programa inklui planu estratéjia no orsamentu ALMAMOR nian ba periode tinan 2017-2022.
Aleinde ne’e, fó kbi’it tomak ba Estrutura Eleito ALMAMOR hosi hosi Konsellu Lejizlativu, Jurídiku no Ezekutivu ba períodu tinan 2017-2022 hodi harii Departementu no Unidade ne’ebé nesesáriu no sufisiente liu-hosi organograma (gráfika estrutura) ALMAMOR ne’ebé forte hodi implementa atividade no programa tomak ALMAMOR nian bazeia ba planu atividade tomak ne’ebé Terseiru Kongresu haruka.
Hato’o mós proposta no pareser ba Parlamentu Nasionál atu hamosu Dekretu-Lei ida hodi konsidera ALMAMOR hanesan Mahon Úniku ba Múziku hodi serbisu no sai parseria di’ak ho institusaun relevante sira Governu nian, kontrola no halo advokasia ba kualker atividade múzika iha rai laran inklui promove músika Timor iha mundu.
Erick hatutan dehan terseiru kongresu ne’e mós Komisaun Organizadora no estrutura eleitu ALMAMOR períodu 2017-2022 sei fahe sertifikadu nu’udar lembransa ba artista lubuk balun inklui Fundadór ALMAMOR nian ne’ebé fó ona kontribuisaun ba luta libertasaun nasionál liuhusi múzika ne’ebé sira kompozita no hananu, sai knananuk populár ou legendáriu.
ALMAMOR mós sei fó apresiasaun no lembransa ba artista ne’ebé depois ukun án hamorin ona Nasaun iha mundu ho kategoria múzika oi-oin.
Atu realiza eventu refere, sábadu foin lalais ne’e Comitte Orientadora ALMAMOR serbisu hamutuk ho Steering Comitee ALMAMOR ne’ebé harii iha loron 14 janeiru 2017 halo preparasaun liuhusi diskusaun, involve deputadu Komisaun F Parlamentu Nasionál ba asuntu Juventude no Desportu, Eládio Faculto ho artista hahú hosi juniór to’o seniór.
Diskusaun ne’e, artista sira konkorda atu alkansa kongresu ALMAMOR nomós ko’alia kona-ba ezbosu lei artista ne’ebé haruka ona ba Komisaun F Parlamentu atu aprova, nune’e proteje artista en-jerál no kompozitór sira nia direitu.
Jornalista: Xisto Freitas
Editora: Rita Almeida
