DILI, (TATOLI) – Parlamentu Nasionál (PN) liuhusi Komisaun F ne’ebé trata asuntu Desportu no Juventude sei hala’o audiénsia ho artista en-jerál, múziku no pintór iha munisípiu Liquiça, 26 abril 2017.
Hasoru malu ne’e konvida mós ALMAMOR hanesan asosiasaun úniku ne’ebé reprezenta múzika, oinsá bele aprezenta pareser ruma kona-ba direitu autór iha arte.
“Ami sei fó hanoin ba sira katak lei ne’e valoriza duni artista sira iha rai laran ka lae, antes hetan aprovasaun iha Parlamentu Nasionál”, Prezidenti Komisaun Organizadór Terseiru Kongresu ALMAMOR, Erick Waiwatu ba jornalista sira liuhusi konferénsia ba imprensa ne’ebé hala’o iha Hotel Vila Verde, sábadu (22/4).
Biban ne’e, Vise Prezidenti Komisaun Organizadór Terseiru Kongresu ALMAMOR, Ego Lemos rekuñese katak Parlamentu Nasionál nia mandatu lejizlativu hela fulan rua de’it maibé garante bele aprova projetu lei ne’e nu’udar prezente ba artista sira.
“Membru Komisaun F garante katak sira sei aprova lei ne’e. Tanba ida ne’e maka to’o agora ami sei fiar metin Parlamentu Nasionál nia promesa”, informa.
Enkuantu, membru komisaun F, deputadu Eládio Faculto informa deputadu hotu-hotu halo apresiasaun ba projetu lei ne’e no deputadu sira konsege hatún lei ne’e ba Komisaun espesializada (komisaun F no A) atu rona grupu artista sira.
Nia esplika katak antes mandatu ramata, lei ne’e oferta ba governu hodi tau-matan ba artista sira.
Eládio fiar katak ho mandatu fulan rua sira sei bele aprova tanba Prezidente PN, Aderito Hugo da Costa kompromete katak fulan ida tenke halo ramata audiénsia ho parte kompetente, halo relatóriu no deskute iha plenária para ikus mai bele haruka ba Prezidente Repúblika promulga.
Antes ne’e, laiha lei ida garante ba direitu autór. Tanba ne’e, obra barak maka ema seluk kópia ho ilegalmente maibé difisil ba autór atu reklama direitu basá seidauk iha lei ida maka garante.
Jornalista: Xisto Freitas
Editora: Rita Almeida
