DILI, (TATOLI) – Ministru Negósiu Estranjeiru no Kooperasaun (MNEK), Hernani Coelho hatete governu la-mete prosesu kandidatura eis-embaixadora Timor-Leste (TL) ba Organizasaun Nasaun Unida (ONU), Sofia Mesquita Borges ba adjunta Sekretáriu-Jeral (SekJer) ne’ebé lidera husi Sekjer, António Guterres.
“Kandidatura ne’e pesoál depois ita-nia governu fó apoiu. Portantu, prosesu ne’e, tuir prosesu Nasaun Unida nian,” informa Coelho iha Ministériu Negósiu Estranjeiru no Kooperasaun (MNEK), Praia dos Coqueiros, segunda (24/04).
Nia hatutan: “Ita akompaña de’it, iha buat ruma karik ita hatan maibé seidauk iha buat ruma”.
Kandidatura timoroan ne’e ba adjuntu sekretáriu-jeral ONU, governu liuhusi reuniaun Konsellu Ministru (KM), tersa (14/3), iha Palásiu Governu aprova rezolusaun ida hodi fó apoiu.
Rezolusaun ba kandidatura Sofia Borges ba pozisaun adjunta ne’e aprezentadu husi Ministru Negósius Estranjeiru no Kooperasaun.
Governante ne’e informa, prosesu kandidatura ba eis-Komisaun eleitorál Australiana ba Konsulta Populár TL, 30 Agosto 1999 ba Adjuntu Sekretáriu Jerál ne’e, Sekretáriu Jerál fó sai liuhusi vaga no ema ne’ebé iha interese ba kandidata.
“Sira sei iha sira-nia painel ida halo avaliasaun tuir prosesu Nasaun Unida nian. Iha ne’e, ita la mete. Ita fó apoiu ba nia kandidatura maibé ita la mete nia prosesu ne’e. Prosesu nasaun unida nian”, informa.
Jornalista: Rafy Belo
Editora: Rita Almeida
