DILI, (TATOLI) – Deputadu Parlamentu Nasionál kontinua kestiona kondisaun estrada iha parte Vikeke, ligasaun Uatocarbau nomós Letefoho ba Atsabe, munisípiu Ermera.
Deputadu José Luis Guterres hosi bankada Frente Mudansa husu atu Ministériu Obras Públikas buka solusaun hodi normaliza kondisaun estrada munisípiu Vikeke liga ba Postu Administrativu Uatolari ho Uatocarbau.
“Kondisaun grave tebes, ministru Obras Públikas tenke buka dalan atu haree kondisaun ne’e”, José Luis Guterres alerta iha plenária, tersa (25/4).
Hanoin hanesan hato’o hosi deputadu bankada Partidu Demokrátiku, Virgilio Hornay katak, povu sira iha Letefoho ho Atsabe, oras ne’e sofre bainhira hala’o atividade ekonómia tanba kondisaun estrada la di’ak.
Ho nune’e nia husu ba Sekretária Estadu asuntu Parlamentár atu hato’o preokupasaun ba parte kompetente.
“Ha’u duvida tanbasa mak IGE (Instituisaun Gestão Ekipamento) la-halo intervensaun imediatamente”, kestiona.
Entertantu Sekretária Estadu asuntu Parlamentár dehan sei hato’o preokupasaun deputadu sira nian ba Ministériu Obras Públikas hodi hatan.
Jornalista: Manuel Pinto
Editora: Rita Almeida
