DILI, (TATOLI) – Forsa Defeza Timor-Leste (F-FDTL) presiza hetan teste Human Immunodeficiency Virus and Acquired Immunodeficiency Syndrome (HIV/SIDA) ho kualidade atu garante isin di’ak hodi asegura seguransa iha Nasaun.
Diretora Church World Service (CWS), Odete da Costa Peloy ba Tatoli iha Jl Vila, Fatuhada, tersa (25/4) hafoin halo abertura ba workshop kona-ba “HIV Policy For Implementation HIV Testing”
“Rezultadu teste HIV/SIDA ba Forsa-Defeza Timor-Leste (F-FDTL) durante ne’e hatudu pozitivu maibé tenke kontinua halo teste tanba sira risku ba transmisaun moras”, hateten Diretora CWS.
Liuhosi teste HIV/SIDA mak bele deskobre moras no programa prevensaun tenke kontinua.
Organizasaun Internasionál CWS, Ministériu Saúde, Organizasaun Saúde Mundiál esforsu hodi apoiu oinsá hadi’a kualidade teste atu hetan saúde di’ak hodi hala’o kna’ar hanesan normál.
Teste HIV/SIDA ba F-FDTL la’o durante tinan lima, hahú 2013 to’o 2017, hosi implementasaun programa ne’e atu haree rezultadu, atinjimentu no obstakulu sira durante ne’e.
“Rezultadu teste HIV/SIDA hatudu pozitivu no atinje duni objetivu atu forsa sira tenke saúde di’ak nafatin hodi servi Estadu, enkuantu, dezafiu ba implementasaun teste, ekipamentu atu halo teste laiha iha Servisu Autónomia Medikamentu Saúde (SAMES), ami tenke ba hola iha Indonezia atu bele halo teste ba forsa sira”, haktuir.
Enkuantu, dadus HIV/SIDA ne’ebé mak rejistu iha Ministériu Saúde hamutuk ema 641, feto 312 no mane 330, hosi sira ne’e, mate hamutuk 80.
Moras afetadu sira hosi joven feto no mane ho idade 25 to’o 44, signifika kuandu númeru aumenta bele hamosu impaktu ba sosiedade ne’ebé saudavél.
Jornalista: Zezito Silva
Editora: Rita Almeida
