DILI, (TATOLI) – Prezidenti Repúblika, Taur Matan Ruak hanaruk tan mandatu José da Costa Ximenes nu’udar Prokuradór Jerál Repúblika ba tinan haat.
Xefe Estadu husu atu haka’as-án defende independénsia Ministériu Públiku, ierárkia no kualidade hodi hala’o kompeténsia konstitusionál sira hanesan kaer metin legalidade demokrátika, reprezenta Estadu, liuliu hala’o asaun penál.
“Ida ne’e maka nu’udar aktu justisa atu hanaruk tan mandatu hosi titulár ba kargu daudaun nian”, hato’o Xefe Estadu liuhusi komunikadu ofisiál Palásiu Prezidénsiál ne’ebé TATOLI asesu kuarta ne’e.
Nomeasaun dahuluk iha fulan-abríl 2013. Antes ne’e, asume kna’ar nu’udar Prokuradór Distritu Dili, Baucau no Kovalima.
Ulun boot ministériu públiku ne’e akaba lisensiadu Direitu iha Universidade Gadjah Mada, Jogjakarta Indonézia, tinan 1999.
Hosi 2004 to’o 2007, partisipa formasaun majistradu no defensór públiku iha Sentru Formasaun Jurídika Dili.
Serimónia tomada pose sei hala’o iha loron 28 fulan-abríl, tuku 10.00.
Jornalista: Xisto Freitas
Editora: Rita Almeida
