DILI, (TATOLI) – Primeiru Ministru, Rui Maria de Araújo husu ba profesionál saúde, tékniku siéntifiku atu servisu ho rigór, nune’e bele elimina moras malária iha Timor-Leste.
Hafoin loron mundiál malária ba dala VIII iha Timor-Leste ho tema “Halakon malária, di’ak ba ema hotu” ne’ebé selebra direta hosi Xefe Governu iha Hera, kinta, (27/4).
“Redusaun kazu malária hosi 2006 iha 223 maibé 2017 tun ba 95, ne’e akontese tanba esforsu diresaun saúde públiku ne’ebé halo vizilánsia epidemolójika”, katak tan.
Susesu programa nasionál tanba aplika konseitu rigór no tékniku siéntifiku ne’ebé di’ak, entaun presiza kontinua halo vizilánsia nafatin atu Timor-Leste bele halakon moras ne’e.
Kuandu la tau matan, la-halo jestasaun didiak hosi epidemolójiku kímiku atu trata kazu ne’e didiak entaun ba futuru bele aumenta tan.
Ministeriu Saúde halo fila fali revizaun oinsá organiza esforsu sira ne’e, programa saúde na família tenke sai instrumentu hodi ativa liu tan vizilansia epidemolójika ou tratamentu klíniku ba malária.
Jornalista: Zezito Silva
Editora: Rita Almeida
