DILI, (TATOLI) – Vise-Misistru Finansa, Helder Lopes hatete, liuhosi reforma fiskál ne’ebé agora dadaun la’o, governu komprometidu prevé lakuna no defisiénsia sira iha área alfándega no impostu.
Hanoin ne’e la’o di’ak, tenke foku ba reforma iha área administrasaun katak tau sistema ne’ebé di’ak para fasilita kobransa ne’ebé halo. Hanesan sistema Asycuda World ne’ebé minimiza interasaun entre ema ho ema.
“Setór privadu ida mak mai trata nia surat, ita tenke minimiza nia interasaun ho ofisiál alfándega, liuhusi sistema ne’e prevé ona para ema halo korrupsaun. Impostu nian mós ita sei estabelese sistema ne’ebé hanesan atu minimiza interasaun husi ema ba ema. Ida ne’e husi área administrasaun ne’ebé ita halo”, Vise dehan iha Muzeu Rezisténsia, horisehik.
Sei buka meiu mós liuliu husi enkuadramentu legál sira para bainhira temi korrupsaun iha autoridade. Aleinde ne’e iha impostu nian ema barak evita selu impostu, tanba ne’e mak husi aspetu enkudramentu legál, sei kria sistema ne’e para kaptura informasaun hotu hodi identifika katak ema sira ne’ebé tenta la selu impostu sei hatene.
“Ita kaptura liuhusi sistema depois ita bele bá husu sira para selu impostu”.
Governu komprometidu kombate korrupsaun iha área alfándega no impostu. Esforsu balun la’o ona no balun sei halo liga ho rekursu umanu iha área rua ne’e tanba sei halo rekrutamentu ba staff foun.
Kritéria fundamentál rua bainhira atu rekruta mak koñesimentu katak tenke iha kapasidade no integridade. Kuandu rua ne’e laiha sei larekruta.
Diretór Jerál Alfandega, José António Fátima Abilio hatete prosesu reforma fiskál, alfándega iha pilár haat mak enkuadramentu legál ne’ebé ho apoiu reforma fiskál ne’ebé konsege iha ona kódigu aduaneiru foun ne’ebé akumula dekretu lei neen no simplifika kódigu foun ne’e bele ajuda prosesu alfándegamentu iha servisu.
Pilár seluk mak sistema Alfándega daudaun uza Asycuda ++ no iha ona faze tranzisaun ba Asycuda World no pilár rua tan mak rekursu umanu no infraestrutura.
Sistema mudansa husi Asycuda ++ iha projetu pilotu ida ne’ebé daudaun implementa no projetu ne’e rasik iha faze tolu.
Diretora Jerál Impostu, Mónica Rangel da Cruz hatutan daudaun ne’e iha estrutura foun ba administrasaun tributária atubele hadi’a liután efisiénsia no moderniza prosesu administrasaun tributária.
Hanesan instituisaun ne’ebé presta servisu ba kliente presiza iha sistema ne’ebé intergradu atubele hadi’a kualifikasaun rekursu umanu hodi halo servisu di’ak liután ba futuru.
Jornalista: Maria Auxiliadora
Editora: Rita Almeida
