DILI, (TATOLI) – Prezidente Repúblika eleitu, Francisco Guterres Lú-Olo hatete hafoin tomada posse iha loron 20 fulan ne’e, promete sei la partisipa kampaña eleisaun parlamentár.
Ne’e duni, nia husu ba estrutura, militante no simpatizante FRETILIN atu hotu-hotu apoiu Sekretáriu Jerál FRETILIN, Marí Alkatiri iha kampaña parlamentár ho liafuan ida de’it no ain fatin ida de’it atu hakat ba oin.
Durante jantar konfraternizasaun ne’ebé hala’o iha restaurante Terra Santa Kaikotu-Komoro, sábadu foin lalais ne’e, atuál prezidente partidu FRETILIN ne’e husu mós ba FRETILIN hotu atu partisipa iha prosesu dezenvolvimentu Nasaun.
“Nu’udar prezidente ida susesu, ha’u hakarak hateten katak ha’u tama iha Palásiu Aitarak-Laran FRETILIN tomak tenke kontinua mantein serbisu para atu bele partisipa iha dezenvolvimentu nasionál, liu-liu polítika governasaun Nasaun, polítika kona-ba edukasaun nian, saúde, agrikultura no infraestrutura”, dehan.
Tuir nia, serbisu hotu-hotu sempre iha dezafiu no sasukat ba ema nia susesu. Tanba ne’e, apela ba ema hotu-hotu atu labele konsidera dezafiu hanesan barreira ida.
“Ha’u iha konsiénsia ba dezafiu ne’ebé maka iha oin, maibé dezafiu ne’e boot oinsá ha’u sei ba hasoru nafatin. Ne’e ha’u nia konviksaun ida atu hakat ba oin”, hatutan ba militante no simpatizante FRETILIN durante jantar konfratenizasaun.
Biban ne’e, Prezidente eleitu promete hakarak sai prezidenti repúblika ida diferente no susesu. Diferente tanba kumpri de’it obrigasaun konstituisaun hodi serbi Nasaun ne’e. Diferente tanba la’ós mai hanesan kandidatu independente maibé hosi partidu.
Lú-Olo realsa, prezidente susesu maka FRETILIN iha polítika ida ne’ebé hakarak teb-tebes atu bele lori rai ida ne’e ba oin liuhusi dezenvolvimentu sustentável para povu bele sente realmente saida maka FRETILIN hakarak atu halo ba rai ida ne’e.
Jornalista: Xisto Freitas
Editora: Rita Almeida
