DILI, (TATOLI) – Ministru Edukasaun, António da Conceição hatete governu liuhosi ninia parte sei hanaruk kontratu bolseiru Portugal nain 60 ne’ebé haruka iha 2012. Tanba, ME laiha intensaun atu hapara bolsa ba estudante sira.
“Orsida ha’u buka hatene atu nafatin estende (hanaruk) sira-nia kontratu”, garante governante ne’e hodi hatan ba Ajénsia Tatoli iha Sentru Inforedepe Balide, ohin.
Preokupasaun bolseiru na’in 60 ne’e, ministru edukasaun konsidera ne’e kestaun administrativu de’it no problema rekursu umanu.
“Kestaun administrativu de’it. Laiha intensaun seluk, Ministériu Edukasaun iha difikuldade, rekursu umanu ne’ebé mak iha, maske iha ema barak mós serbisu kle’ur ona maibé sei presiza tempu nafatin atu aprende”, haktuir.
Seluk mak impaktu husi mudansa prosedimentu governu nian rasik. “Mudansa prosedimentu ne’ebé tau iha governu rasik implika ba ema atu ajusta-án iha ne’ebá ho sira-nia serbisu sira”, hatutan.
Governante ne’e reforsa no garante bolseiru na’in 60 ne’ebé agora dadaun kontratu la estende buka atu hanaruk nafatin sira-nia kontratu.
Notísia relevante: http://www.tatoli.tl/2017/05/bolseiru-portugal-sei-fila-laiha-tittlu-kuandu-governu-la-hanaruk-kontratu/
Jornalista: Rafy Belo
Editora: Rita Almeida
