DILI, (TATOLI) – Jogadór nasionál hamutuk 23 hosi klube 21 sei partisipa kompetisaun Association Football Confederation (AFC) iha 17 jullu no Sea Games iha 19 agustu tinan ne’e iha Vietname.
Sira ne’e selesionadu no sei lidera hosi treinadór selesaun nasionál hosi Korea, Kim Shin-hwan.
Jogadór hirak ne’e durante partisipa iha Liga Futeból Amadora no dadaun ne’e ho ativu treinu iha Kampu Demokrasia Dili.
Diretór Arbitrajen hosi Federasaun Futeból Timor-Leste (FFTL), Gelagio da Silva liuhusi konferénsia ba imprensa ne’ebé hala’o iha sede FFTL, Kampu Demokrasia, Bairos dos Grilhos, sesta ne’e, hateten partisipasaun selesaun nasionál iha kompetisaun AFC sei finansia hosi AFC no FFTL. Enkuantu, Sea Games sei responsabiliza hosi governu liuhusi Sekretaria Estadu Juventude no Desportu (SEJD).
Iha biban ne’e, treinadór Kim Shin-hwan hatete sente orgullu bele hola parte iha ekipa futeból nasionál maske hatene katak serbisu ida ne’e la’ós fásil no sei fó presaun barak ba nia.
“Hanesan treinadór ekipa nasionál nian, ha’u sempre iha hanoin oinsá para lori ekipa nasionál ida ne’e bele fó rezultadu di’ak. Ha’u mós sempre loke oportunidade ba maluk sira hotu ne’ebé hakarak fó sujestaun atu bele ajuda ha’u atu ita hamutuk bele dezenvolve futeból Timor-Leste”, dehan.
Atuál treinadór AD SLB Laulara promete sei haka’as án hodi treinu jogadór sira ho di’ak liu-tan.
Antes ba partisipa eventu rua refere, Kim afirma, jogadór sira sei ba treinu durante loron 20 iha Korea.
Tan ne’e, nia husu ba ofisiál LFA nomós treinadór ekipa ida-idak nian, atu fó lisensa ba jogadór sira ne´ebé nia hili ona tanba ne’e oportunidade atu hasa’e jogadór sira nia kapasidade joga.
Jornalista: Xisto Freitas
Editora: Rita Almeida
